【車迷觀點】梅迪歷藥禁事件終落幕 英足總個龍門搬到去火星
屌，真係唔好再嚟喇。
兩個鐘前，英格蘭足總先突然公佈車路士油王年代74項違規嘅判決，搞到我即刻放低原本準備好嘅文，臨急臨忙寫多篇解釋文。唔夠兩個鐘，我以為終於可以收工餵奶瞓覺，英足總又突然掉份聲明出嚟：
「梅迪歷，禁賽結束，即時可以復出。」
嗯，好，咁我再出多一篇突發啦。但如果再有第三單，麻煩大家當無睇到，我想休息。
講返梅迪歷，今次我又要厚顏無恥咁讚自己。今年4月30日，梅迪歷被判停賽四年嗰晚，我曾經計過一個最樂觀劇本：「最快喺今年夏天，佢就可以甩難，光明正大咁行返入車路士嘅訓練場，甚至隨時趕得切參與季前熱身賽。」
三個月後，梅迪歷真係即時解禁。根據Nizaar Kinsella報道，佢甚至預計會直接前往香港，同車路士大軍會合。
係咪好神？係咪應該將我由球壇燈神個LIST度除名？
唔好意思，睇嚟唔可以。因為我同紫霞仙子一樣，估中咗個開頭，估唔到個結局。
估中一部份，但個龍門搬咗去火星
我當時條公式其實好簡單：梅迪歷已經捱咗16個月，如果佢嘅律師團隊可以照辦煮碗，說服體育仲裁法庭將四年刑期劈到同普巴一樣嘅18個月，咁佢最多再等兩個月，就可以喺今個夏天復出。
結果，18個月無出現，CAS亦無正式推翻判決。真正救返梅迪歷嘅，係
WADA直接拆走成個龍門，再搬到去火星。
根據英格蘭足總最新聲明，梅迪歷喺2024年10月接受藥檢時，樣本入面驗出低濃度嘅Meldonium。今年1月，獨立紀律委員會裁定佢違反禁藥規例，正式判處四年禁賽。梅迪歷其後向CAS提出上訴，原本大家都以為，下一場仗會係爭論佢有無蓄意服藥、責任有幾大、刑期又應該減到幾短。
但喺上訴期間，WADA更新咗一份叫做TD2027MRL嘅技術文件，為Meldonium加入新嘅最低呈報水平。
簡單啲講，以前實驗室驗出極低濃度嘅Meldonium，仍然可能需要舉旗報告；新標準就將條界線大幅搬遠，低過指定濃度嘅結果，連成為禁藥個案嘅呈報門檻都掂唔到。
而英足總份聲明最爆炸性嘅一句，就係佢哋親口承認：如果梅迪歷嗰個樣本係今日先收集，當中嘅Meldonium濃度根本唔會被呈報，亦唔會構成任何禁藥違規。
即係話，梅迪歷唔係靠律師證明自己清白，亦唔係CAS突然大發慈悲幫佢減刑。佢只係坐咗接近20個月波監之後，球證先行過嚟同佢講：
「唔好意思，球例更新咗。你當日嗰球原本判入，但VAR睇完最新條界線，發現個龍門已經搬咗去火星，所以入球無效。」
當日足以判佢停賽四年嘅濃度，放到今日，連開案都未必開得成。梅迪歷估唔中個龍門會搬咗去邊，我估唔中條算式應該點計，但最終大家居然都撞中同一個答案：今個夏天，佢真係可以復出。
龍門搬走咗，但張黃牌無取消
不過，呢度有一點非常容易令人誤會：梅迪歷唔係上訴得直，亦唔係獲判無罪。
WADA份新技術文件並無追溯力。換句話講，雖然同一個樣本放到今日，低濃度到連舉旗報告都唔需要；但喺2024年接受檢測嗰刻，佢確實踩中咗當時條界線。龍門今日搬咗去火星，唔代表足總會返轉頭，將前年嗰張賽果重新改寫。
所以，梅迪歷最終接受咗自己違反禁藥規例，英足總亦無撤銷原本嘅違規裁定。雙方只係喺WADA同意之下，根據《世界反禁藥規章》第10.8.2條達成和解：梅迪歷承認違規，刑期就改為等同截至和解當日已經服完嘅時間。
翻譯成人話，就係：「你仍然有罪，但你已經坐夠。」
於是，原本仲有超過兩年先完結嘅四年禁賽，喺一紙協議之下突然變成服刑完畢。梅迪歷唔需要再等CAS開庭，唔需要再等法官逐項拆解牛牛幹細胞、烏克蘭隊醫同舒夫真高嗰堆羅生門，亦唔需要證明自己究竟係點樣攝取到Meldonium。
至於成件事嘅真相係乜？唔知道。
英足總份聲明只係含糊咁提到，除咗WADA修改技術標準之外，和解亦考慮咗案件嘅「其他情況」。究竟係污染、醫療失誤、無心服用，定真係有一隻啪咗藥嘅牛，官方一樣無交代。
所以大家暫時唔好急住幫梅迪歷寫成沉冤得雪嘅主角。佢無洗脫罪名，牛牛劇本亦無獲得官方認證。唯一可以肯定嘅係，對住一個以今日標準連案都未必開得成嘅低濃度結果，英足總、WADA同梅迪歷最終都同意，無必要再將餘下兩年幾刑期執行落去。
PS，如果你唔知我講緊咩牛牛劇本，建議睇返舊文：
總結：刑期完咗，失去嘅時間無得還
對英足總同WADA嚟講，呢單案或者已經正式結束。更新技術標準、簽署和解協議，再用一句「即時恢復參賽資格」，所有法律程序就可以整整齊齊咁放入檔案櫃。
但對梅迪歷嚟講，事情無可能就咁一筆勾銷。
由2024年12月被臨時停賽開始，佢已經失去接近20個月。對一個普通人嚟講，20個月可能只係轉兩次工、換兩部電話；但對一個依賴速度同爆發力、正值25歲黃金年齡嘅職業球員嚟講，呢段時間可能就係成個生涯最珍貴、亦最無可能補返嘅部分。
更何況，解禁只係代表佢重新獲准踢波，唔代表沙比會自動喺陣容入面留返個位俾佢。
梅迪歷離開嗰陣，車仔左路仲有辛祖；到佢準備返嚟，辛祖走咗，加拿祖亦同佢擦身而過，基頓斯同一班新兵已經進入球隊。接近20個月無正式比賽嘅佢，體能、節奏、判斷力仲剩低幾多？沙比又願唔願意花時間，重新教呢架一直有速度、但未完全學識轉彎嘅跑車？
全部都係未知之數。但至少，佢終於有資格親自回答。
以前佢只能夠喺Uxbridge嗰塊空蕩蕩嘅人造草地上面，一個人對住攝影機重複跑動同射門；依家佢或者可以飛去香港，重新行入真正嘅車路士訓練場，同隊友一齊爭一個位置。
四年禁賽曾經幾乎斬斷佢嘅職業生涯，WADA搬走個龍門亦還唔返失去嘅20個月。但同辛祖、加拿祖擦身而過之後，梅迪歷嘅前路未必已經封死，可能只係要由另一個方向重新開始。
嗰把喺黑夜入面磨咗接近兩年嘅刀，終於可以再次出鞘。至於仲利唔利，今次唔使再等英足總判。交返俾梅迪歷自己證明。