【球壇風向室】每個足協派2,000萬都唔買帳 恩芬天奴想賣嘅唔只係世界盃

恩芬天奴到底想賣乜？

大家入嚟都應該係睇我鳩up，否則應該走去問AI就有答案啦係咪？簡單講，恩芬天奴想

開一間新公司。

呢間公司叫FIFA Forward Enterprise，簡稱FFE。FIFA打算將世界盃、女子世界盃、世界冠軍球會盃等旗下賽事嘅轉播、贊助、門票、商品授權同營運生意，全部集中放入呢間公司，再以200億美元估值，出售最多20%股權俾私人投資者，預計套現最多42億美元。42億美元，即係我身家嘅1%左右，其實係閒錢嚟。(好似係)

所以新聞所講嘅「出售世界盃」，唔係聽日有個中國/沙特富豪俾錢買起座獎盃，之後想借俾邊個踢就借俾邊個踢。FIFA仍然會持有至少八成股權，亦聲稱賽制、賽程、規例同所有足球決策都繼續由自己控制，私人股東無權話事。

但人哋現兜兜俾42億美元出嚟，唔通係為咗有個名叫自己做股東同拎張世界盃VIP飛影相打卡放IG咩？佢哋買到嘅係FIFA旗下賽事未來一部分商業價值，只要世界盃轉播、贊助同門票繼續愈賣愈貴，呢兩成股權自然有機會升值，同股票一樣。

咁FIFA套現返嚟嘅42億，又準備用嚟做乜？

答案係派錢。

FIFA提出向旗下211個成員足協，各自提供最多2,000萬美元一次性發展資金，用嚟興建球場、訓練中心、發展青訓、女足同基層足球。

211乘2,000萬，答案係42.2億。無錯，差唔多就係成筆賣股收入。

換句話講，恩芬天奴成個計劃就係將未來世界盃嘅部分商業價值提前套現，再將筆錢派俾今日嘅211個成員足協。聽落又唔係完全無道理。特別對一啲細國足協嚟講，2,000萬美元隨時足以改變成個國家嘅足球基建。

照計大家有錢收應該好開心，咁點解最後反而嬲到要杯葛世界盃咁奇怪？

2,000萬都唔收貨？

因為成單交易最大嘅問題，唔係個銀碼，而係恩芬天奴收收埋埋，差唔多傾掂晒先通知大家。

FIFA已經搵咗美國銀行JP Morgan幫手設計交易，定好200億美元估值，搵埋主要投資者，甚至連42億點樣派俾211個成員足協都計好晒。但UEFA、亞洲足協同中北美洲足協全部表示，事前根本無被正式諮詢，部分FIFA Council成員以至內部高層，一樣全部「柒撚懵懵食甜筒」。

即係恩芬天奴已經搵好地產經紀、傾好價錢、印埋臨時買賣合約，最後先返屋企通知全部有份嘅屋企人：「我諗住賣咗兩成祖屋，人人有錢分，無問題吖嘛？」嗯，實無問題啦笑死。

更加有趣嘅係，準備帶頭投資FFE嘅Thrive Eternal公司，係由侵侵女婿個親細佬Joshua Kushner創立。簡單講，侵侵唔係買家，準備帶頭買嘅係佢女婿細佬間投資公司。(汗……我睇咗三次先明。)

單憑呢層關係，當然唔足以證明有咩枱底交易；但恩芬天奴近年同侵侵Friend過打Band，世盃世冠盃都孖公仔咁形影不離，突然又想同侵侵家族有關嘅投資公司做一單42億美元生意，呢個畫面點都係唔好睇。

不過真正令成員足協反枱嘅，仲唔只係觀感。

因為負責批准呢項計劃嘅，正正就係有機會收到2,000萬美元嘅211個成員足協。而2027年FIFA主席選舉，決定恩芬天奴能否連任嘅，亦係同一批人。

我唔會就咁話2,000萬係買票，始終細國足協真係需要資金發展足球。但當恩芬天奴將「批准我單交易」、「收取2,000萬」同「出年投票俾邊個做主席」三樣嘢放喺同一張枱上面，你話佢無心咁做真係跳落黃河都洗唔清…

UEFA旗下55個成員甚至話，只要方案一日存在，就杯葛世界盃及其他FIFA賽事。亞洲同中北美洲足協亦加入反對，連FIFA內部都有高層辭職，另有高層公開倒戈，形容成件事係恩芬天奴「一個人嘅Project」。

結果方案公開短短三日，恩芬天奴就宣布收回。

你以為咁就完？太天真啦……飲啖水繼續講。

無權話事，又點樣影響世界盃？

講到呢度，仍然有一個問題未答：FIFA明明話私人股東無權干預賽制同賽程，點解大家仍然認為，賣走兩成商業股權會改變世界盃？

FIFA對呢個問題嘅答案好簡單：唔會，諗下都知佢哋會咁答啦。

按照官方講法，私人投資者最多只係持有FFE兩成股權，唔會參與日常營運，亦無權決定世界盃踢幾多隊、幾時舉行、賽程點排。FIFA繼續控制所有足球決策，總之大家俾錢就得，波壇嘅事唔使你理。

技術上，呢套講法無錯。但我諗極都唔明，人哋俾42億美元買你兩成股權，唔通真係純粹想支持世界和平咩？

私人投資者唔需要直接坐入會議室大叫「我要64隊世界盃」，先可以影響世界盃。只要FFE嘅價值來自轉播、贊助、門票同廣告收入，FIFA以後每一個決定，自然都會多咗一條問題：

「咁樣做，間公司會唔會賺多啲？」

而其實唔使等私人股東入場，呢個方向大家今屆已經睇到。

世界盃由32隊加到48隊，賽事數量大增；球員本身已經踢到過勞，依家仲有人研究2030年再加到64隊。因應高溫而設嘅飲水時間，我明係保護球員需要，但同時亦成功將原本連續嘅比賽切開，變成一個又一個可以插入廣告嘅時段。去到決賽，連中場休息都可以加插大型表演，足球愈嚟愈似向Super Bowl條路進發。

以上全部都係私人股東出現之前，FIFA自己已經做緊嘅事。

咁當外面再多一班俾咗42億美元、等住盤生意升值嘅股東，你覺得佢哋會唔會捉住恩芬天奴隻手溫柔咁講：「天奴，夠啦，球員會攰，球迷睇得舒服最重要，我哋少賺啲唔緊要。」

至於你信不信，我反正信了。

賣嘅唔只係兩成股權

講到呢度，就已經差唔多滿足到我嘅好奇心，舒服晒。

當然，商業化本身唔係原罪。世界盃一直都靠轉播同贊助賺錢，無收入亦無可能向細國足協派發發展資金。問題係足球最獨特嘅地方，正正係球證一吹雞之後，場波可以連續流動45分鐘，而唔係每隔幾分鐘停低賣廣告、睇表演，再提醒你今節賽事由邊間汽水公司全力贊助。

恩芬天奴今次想做嘅，就係將未來世界盃嘅商業價值提前套現，準備今日派俾211個成員足協；至於將來要點樣加比賽、加廣告同加收入，滿足私人股東對回報嘅期望，就留俾下一代球員同球迷慢慢找數。

好彩今次就算每個足協最高有2,000萬美元，恩芬天奴都換唔到足夠支持，方案公開三日就玩完。但成件事至少令大家睇清楚，恩芬天奴想賣嘅唔只係FFE兩成股權，而係世界盃未來可以被改造成一件點樣嘅娛樂產品。

如果恩芬天奴真係打算繼續加隊、加比賽、加廣告位，再加插中場表演，將世界盃改造成一件美式娛樂產品，我不如返去睇大谷翔平仲好。至少棒球本身就係一節節停低，唔會有人為咗播廣告，突然斬開一場原本唔應該停嘅足球比賽。