【車迷觀點】車仔74項違規結果終於出爐最重或被禁註冊兩個轉會窗

2026年7月31日

油王阿巴莫域治留低嗰盤舊帳，今日終於正式埋單。

英格蘭足總宣佈，車路士承認油王年代涉及經理人、中介人同第三方付款嘅74項違規，判罰1,000萬鎊，另外加一個暫緩執行嘅兩個轉會窗禁註冊令。

我估有唔少巴打係見到我標題寫「禁轉會」三個字，而入嚟，亦相信唔少非車迷已經開咗香檳，慶祝緊萬惡嘅金錢足球又被正義制裁，不過我有個壞消息要同大家講：車路士唔係即時禁止買人，今個轉會窗依然可以繼續鳩買。

而且相比起最初可能面對嘅扣分，今日呢個結果，已經算係執番身彩。

油王年代到底做過乜？

先嚟回帶一下，雖然已經講過無數次，但都係要重提以免無跟開嘅巴打唔知。今次74項指控，涉及2009年至2022年期間嘅球員交易，無錯，就係你哋最鍾意吹奏果位同Blue Co唔同、純白無垢永遠唔會做錯商業決定嘅油王爸爸年代嘅嘢。

話說當年

部分收購並無完整申報經理人、中介人同第三方付款，當中包括使用未獲授權嘅經理人、隱瞞交易安排，甚至透過其他公司支付無申報款項。

BBC報道提到，同一批歷史交易牽涉約4,750萬鎊秘密付款；而FA今次處理嘅，就係當中涉及經理人、中介人、隱瞞交易同第三方投資等違規。

想睇詳細名單、付款方式同邊幾單交易出事，可以睇返我之前兩篇舊文。今次唔再由頭拆多次，否則呢篇文隨時又變成萬字考古報告。而FA果邊都有原文可以睇，我會放喺最底大家自己參詳一下。

最重要係，呢啲全部都係油王年代嘅舊帳。BlueCo喺2022年收購車路士期間發現問題，之後主動向FA申報，亦一直配合調查。

換句話講，唔係FA突然捉到今日嘅車路士出術，而係新班主買樓驗樓嗰陣，發現前業主喺牆入面埋咗一堆違規水喉，唯有自己報告兼找數。

今次最值得慶幸嘅，其實唔係1,000萬鎊罰款有幾平，而係車路士避過咗扣分。

原審判決本來包括暫緩扣六分，生效期去到2027年6月30日。車路士其後提出上訴，最終上訴庭取消呢項處分，改成同樣暫緩執行嘅兩個完整轉會窗禁註冊令。

點解可以成功上訴？

FA果邊嘅原審委員會認為，舊管理層透過違規操作搶球員，目的之一確實係取得競技優勢；但上訴庭認為，無足夠證據證明車路士實際取得咗幾多競技優勢，更加無證據證明呢啲交易改變過比賽結果、聯賽排名或者獎盃歸屬。

加上案件由新班主主動揭發，涉事行為基本上亦來自舊管理層，要今日嘅球員同球迷用聯賽積分找前朝條數，的確唔算合理。

所以最後結果係：唔扣分，罰1,000萬鎊，再留低一個暫緩禁令作為警告。

對車路士嚟講，呢1,000萬鎊當然唔係碎銀，但能夠用錢解決一單橫跨十幾年、涉及74項違規嘅歷史案件，已經可以講句：無扣分，我哋贏。

等等，咁又話「最重可能要被禁轉會一年」？吹水？

實際文字其實係「暫緩兩個轉會窗禁註冊」，唔係話車路士由今日開始一年內唔可以買人。

車路士目前仍然可以正常收購同註冊球員。只要去到2027年6月30日前，球會唔再犯下同今次相同或者類似性質嘅違規，呢個禁令就唔會執行。計嘅係違規行為幾時發生，即使過咗期限先被揭發，FA仍然可以追究。

如果期間再出事，FA先可以申請啟動全部或者部分禁令，而新違規亦可能另外再罰。

所以呢把刀主要係掛喺車仔頭上，提醒BlueCo唔好再重複油王年代嗰套黑箱玩法。至於體育總監們，仍然可以繼續上網抽幼幼卡，暫時無人阻止到佢哋。

另外，FA表示仍然會調查案件涉及嘅個人責任。即係球會層面嘅主要罰則已經落實，但當年有份參與嘅個別人士，未必已經完全甩身。

今日呢張1,000萬鎊罰單，就係車路士為油王年代嗰套不惜一切代價搶人嘅模式正式找數，亦可能係油王時代留低最後一批需要清理嘅舊帳。

我哋無必要因為呢批違規，就抹走當年球員喺球場上贏返嚟嘅一切，因為判詞亦無證明秘密付款改變過任何賽果或者獎盃。

但同樣地，亦唔應該將件事講成普通文書錯漏，或者又係FA專登針對車路士。舊管理層確實長期使用過唔見得光嘅交易方式，今日只係由完全無參與其中嘅新班主同球會代為埋單。

£10m，無扣分，轉會禁令暫緩。

肉赤就一定有少少，但能夠用呢個價錢清走油王留低最後一批蘇州屎，車路士今次已經算係執番身彩。