【車迷觀點】車仔狂刷SSR先醒起缺張R卡 35歲韋碧克值唔值700萬鎊？
車路士同白禮頓嘅關係，已經去到一個好難用正常轉會市場解釋嘅境界。
由古古尼亞、波特、山齊士、卡些度，一路買到祖奧柏度，唔止球員，由領隊到招聘團隊都可以成套搬走。車路士個 Scouting Filter 入面，可能根本無年齡、位置同價錢，得一條問題：「請問你有無效力過白禮頓？」
只要答案係「有」，恭喜你，已經進入車仔體育總監嘅Shortlist。
所以當消息傳出車路士準備用大約700萬鎊，向白禮頓買入35歲嘅韋碧克，再送上一紙兩年合約，我第一個反應唔係「點解要買個老人家」，而係：白禮頓究竟仲有咩未賣過俾我哋？
笑完之後，呢單轉會其實又無第一眼咁荒謬。韋碧克上季英超37場攻入13球，係職業生涯最高產一季；而車路士亦無需要靠佢擔正，因為祖奧柏度已經確定留隊。
換句話講，問題從來唔係「韋碧克定祖奧柏度」，而係車路士值唔值得再俾白禮頓收多700萬鎊，買一個毋須升呢、唔使重新適應英超，而且甘願做配角嘅成年人。
35歲，但未需要拎生果金
35歲、兩年合約、來自白禮頓。將呢三樣嘢擺埋一齊，確實好容易令人以為車路士今次買嘅主要係經驗、Leadership同更衣室小童照顧服務。
但韋碧克上季最有說服力嘅地方，唔係佢踢過阿仙奴、曼聯，亦唔係佢識得教班𡃁仔做人，而係佢
仲入到波。
上季英超，韋碧克37場攻入13球，背後有12.44 xG支持。實際入球同預期入球幾乎對得上，唔係靠幾腳世界波突然爆Seed，亦唔係每場浪射十次先撞中一球。56次射門有28次中目標，簡單講就係：起腳唔算多，但一半射門都真係要對方龍門做嘢。
呢種效率聽落好似無乜特別，對車迷嚟講卻可能已經係瀕臨失傳嘅古代技藝。
當然，35歲球員突然踢出生涯最高產一季，某程度上亦係警號。車路士買到嘅究竟係遲來嘅第二春，定係啱啱喺股價最高位追貨，無人可以保證。但至少呢13球有足夠機會質素支撐，唔似一次完全無法複製嘅射術奇蹟。
而且車路士唔需要佢下季再入13球先叫合格。只要輪換上陣時仍然識得揀位，將本來應該入嘅波變成入球，已經完成大半任務。
祖奧柏度做主角，韋碧克做好配角
祖奧柏度可以墮後攞波、轉身推進、串連隊友，甚至自己由禁區外創造攻勢。但當佢離開最前線參與組織，禁區入面就需要另一個人接收最後一腳。
否則車仔又會出現一個熟悉畫面：禁區外人人有波踢，禁區內就乾淨過示範單位。
韋碧克可以補上嘅，就係呢段由「組織到攻門」之間嘅距離。
佢唔需要長時間擁有球權，亦唔會搶住做另一個進攻核心。上季每90分鐘只得0.44次成功盤扭，但有15.35次成功傳球，成功率達79.4%。呢組數據描繪出嚟嘅唔係一個持球主角，而係一個識得簡單駁腳，交完波之後重新走入禁區嘅前鋒。
當然，唔好睇見韋碧克有身高，就幻想佢可以背住兩個中堅、贏晒高空波，再等全隊慢慢壓上。佢上季每90分鐘只贏0.76次空中對抗，成功率只有33.9%；整體對抗成功率亦只得36%。如果車路士想搵一架接長傳嘅泥頭車，韋碧克明顯唔係嗰架。
佢嘅價值唔在於改變車路士點樣踢，而係可以直接嵌入現有進攻線。
祖奧柏度缺陣或者需要休息，韋碧克可以頂上；面對收得深嘅對手，兩個亦可以同時出場，由祖奧柏度退後半格，韋碧克留喺最前線牽制中堅。落後追分時，至少車路士可以多放一個真正識得攻擊禁區嘅前鋒，而唔係換多一個翼鋒入場，然後五個人一齊企喺禁區外等波。
700萬鎊買兩年，係交智商稅定買保險？
據報白禮頓可以由韋碧克身上收到大約700萬鎊嘅package，而車路士就會向佢提供兩年合約。對一個35歲、現有合約只剩一年嘅球員嚟講，呢個價錢當然唔係「執到寶」，更加唔係白禮頓突然良心發現，決定回贈返少少積分俾忠誠客戶。
但700萬鎊買到一個上季英超入13球、毋須適應聯賽，而且可以直接落場做二號中鋒嘅球員，亦唔算咩天價。
不過講到呢度，我又突然有一種唔太吉利嘅既視感。
英格蘭球員，踢過幾間大球會，後生時靠速度同爆發力，離開豪門之後重新踢起；然後車路士見佢上一季回春，就決定喺高位接貨，仲話買返嚟可以提供經驗同即食戰力。呢個故事大綱，點睇都有少少似《史達寧2》。
真正令人擔心嘅，當然唔係兩個人履歷啱啱好有幾格撞車，而係車路士會唔會又將「上季仲得」誤讀成「未來幾年都仲得」。
分別在於，史達寧當年係接近4,750萬鎊轉會費、五年長約加頂級人工，買返嚟係做進攻核心；韋碧克就算失敗，700萬鎊加兩年合約，災難規模始終細得多。但呢個分別有一個前提：人工必須符合二號中鋒定位，而唔係當成英格蘭國腳、大球會履歷同上季13球俾錢。
真正值得擔心嘅亦係第二年。韋碧克上季仲可以踢足37場，唔代表36、37歲仍然可以維持同一產量；如果體能或者傷病開始追數，再加上一份主力級人工，呢張保險單就會逐漸變成史達寧個樣。
所以呢單交易合理，但未去到抵到爛。低底薪、出場獎金主導，韋碧克可以係一張有用嘅保單；如果人工失控，咁就唔係買保險，而係換咗張演員名單重拍舊戲，仲要係爛到九彩嘅電影。
總結：買嘅唔係未來，係確定嘅R卡
韋碧克當然唔係一單令人興奮嘅收購，至少我唔會開心到即刻除褲先。
35歲，無升值空間，唔會突然進化成世界級中鋒，甚至連上季13球可以維持幾耐都無人敢保證。單純睇天份同上限，車路士陣中大把後生仔比佢吸引。
但車路士依家最缺嘅，偏偏就係下限。
球會買過一堆有速度、有身體、有潛力、有數據模型認證嘅前鋒，個個都可以喺未來變得好勁；問題係去到真正需要入波嗰陣，大家仍然等緊佢哋識走位、識配合、識揀最簡單嗰個決定。
韋碧克提供嘅唔係特殊武器，只係一啲前鋒本來應該識做嘅基本功。
700萬鎊加兩年合約，唔算執到寶，亦唔係完全無風險。但只要祖奧柏度繼續做主角，韋碧克負責輪換、補位同喺需要時企返入禁區，呢單交易就有佢嘅合理性。
最諷刺嘅係，車路士花咗幾年時間收集全歐洲最有潛力嘅年輕前鋒，最後先發現，原來陣容入面最缺嗰件拼圖，唔係另一張SSR幼齒卡。
只係一張必要時可以上得場，而且知道自己應該企喺邊度嘅R卡。
最後，請容我代白禮頓向車仔管理層問一句：「仆你個街賣埋個屎忽俾你好唔好呀？」