【車迷觀點】車仔狂刷SSR先醒起缺張R卡 36歲軒達臣應唔應該免簽？

36歲，但未退化成吉祥物

一講到軒達臣，最容易寫嘅當然係Leadership。

前利物浦隊長、英超冠軍、歐聯冠軍、英格蘭國腳，經歷過高普年代，由爭四一路贏到幾乎所有重要錦標。放入車路士呢間幼稚園，確實好容易令人幻想佢每日返工第一件事，就係逐個捉班𡃁仔入房，教佢哋紀律、犧牲、勝利文化同綁鞋帶方法。

呢啲嘢可能真係有用，但亦最難證明。始終更衣室無安裝球迷用嘅鏡頭，我哋無辦法統計軒達臣每90分鐘屌醒幾多個隊友，亦唔知一面冠軍獎牌可以激勵幾多個頹廢心靈。

反而上季喺賓福特，軒達臣至少證明咗自己唔係嚟呃人工。

佢英超

上陣32場，累積大約1,922分鐘，當中22次正選。對一個35歲回流英超、原本好多人以為只係返嚟養老嘅中場嚟講，呢個出場量已經唔少。佢唔係每星期坐喺後備席，等球隊領先三球先入場接受掌聲，而係真係被當成輪換甚至階段性正選使用。

產出方面，軒達臣交出3次助攻，背後有2.45 xA支持，唔係靠隊友接到一腳普通橫傳之後，突然扭過四個人射入，白送一個助攻俾佢。

更有意思係，佢全季只創造19次機會，當中卻有8次被列為Big Chance。出手唔算多，但有一部分傳球，確實可以直接將隊友送到接近入波嘅位置。

當然，3次助攻同2.45 xA遠遠未到進攻核心級數，車路士亦唔會因為免簽軒達臣，就突然解決晒破密集防守同把握力不足嘅問題。

但至少36歲嘅佢，仲有一啲可以直接反映喺場波入面嘅用途。

長傳多到嚇死人，準繩度就另一回事

軒達臣製造機會嘅方法，其實相當直接。

上季英超，佢合共有71次準確長傳，平均每90分鐘3.32次；另外送出17次成功傳中，平均每90分鐘0.8次。對一個主要喺中後場活動嘅球員嚟講，產量相當高。

佢唔需要盤扭過人，亦唔需要自己帶波推進幾十碼。接波之後，可以直接用長距離斜傳轉去另一邊，或者趁對方防線未完全退返禁區，提早將個波送到前場。呢類提早送入危險位置嘅傳球唔需要慢慢堆高創造次數，但一旦成功，就可以直接將隊友送入攻門位置。

不過，數字嘅另一面就無咁靚。

軒達臣嘅長傳成功率只有37.4%。計返轉頭，即係佢上季大約嘗試過190次長傳，超過100次直接交失控球權。整體傳球成功率亦只有77.9%，對一個中場嚟講明顯偏低。

所以話佢「長傳好準」，其實唔完全正確。更準確嘅講法係：佢非常願意長傳。

軒達臣唔係以前佐真奴嗰種幫球隊保管控球權嘅安全型中場。佢會主動接受傳失，換取一腳打穿防線或者迅速轉移進攻方向嘅可能性。

呢種踢法放喺賓福特，可以令球隊更快由防守進入反擊；但放入一隊預期會長時間控制球權、經常面對低位防守嘅車路士，效果就未必可以原封不動搬過嚟。

免費簽返嚟嘅，唔係一部永遠唔會出錯嘅傳球機器，而係一個知道自己想將個波送去前面，但要接受途中可能派餐失敗嘅外賣阿公。

外賣員送錯餐，邊個幫佢執手尾？

每次長傳失敗，個波都唔會自動消失，而係落到對方腳下攻返轉頭。

軒達臣上季每90分鐘只贏得2.25次對抗，另外錄得1.26次攔截、0.8次截斷傳球同4.59次回收控球。空中對抗方面，每90分鐘只贏0.61次，成功率41.9%。

呢堆數字反映佢已經唔係一個可以四圍追波、大範圍補位，再靠身體撞開對手嘅中場。尤其自己長傳失敗、球隊立即要面對攻守轉換時，36歲嘅軒達臣未必仲有腳骨力追返張甩咗嘅外賣單。

所以千祈唔好因為佢踢過防中，又見拉維亞長期受傷，就直接將佢當成卡些度嘅後備。

卡些度可以喺被逼搶時轉身、護波、帶球推進，失去控球後又可以大範圍追返對手。呢啲都唔係依家軒達臣主要提供嘅功能。要佢單獨守住中場，就好似叫個送錯餐嘅外賣阿公，順便衝返落樓捉住個食錯餐嘅客。

最合理嘅配搭，反而係將佢放喺卡些度身邊。卡些度負責覆蓋、對抗同處理逼搶，軒達臣就減少帶波，接應之後盡快將個波送去前場。

但如果同安素一齊上陣，問題就麻煩得多。兩個都希望透過傳球控制同推進攻勢，但組合可能缺少一個真正幫手執漏嘅人。一旦比賽變成兩邊高速互爆，中場空間就可能多到可以起間麥當勞連間譚仔都仲有剩。

所以軒達臣唔係任何一個車路士主力中場嘅直接替代品。佢係一件有清楚使用條件嘅工具，身邊必須有人替佢跑、替佢搶，同埋承受高風險傳球失敗後嘅反擊。

用得啱，佢可以令車路士少幾分鐘無意義橫傳，多一條直接送到前場嘅路線；用錯咗，就只係將個波更快送返俾對手。

總結：真正缺嘅唔係老將，係角色

寫到最後，軒達臣值唔值得免簽，反而唔係最重要嘅問題。

真正值得留意嘅係，車路士經歷幾年瘋狂收集天才之後，終於開始承認一件基本事實：組軍同玩Game Card一樣，唔係將二十幾張能力值最高、升值潛力最大嘅卡塞入同一個Deck，就會自動變成一副最強牌組。

以前球會買人，最常問嘅係幾多歲、上限有幾高、將來可以賣幾錢（同有無踢過白禮頓）。至於佢入隊之後負責乜、同邊個配搭、落後或者領先時可以解決咩問題，就留待買完再研究。

結果車路士擁有一堆可以被培養成主角嘅球員，卻缺少願意做好一件唔搶鏡、無升值故事，甚至唔會出現喺Highlight入面嘅配角。

韋碧克同軒達臣真正相似嘅地方，唔係年齡、國籍或者大球會履歷，而係兩個人都無需要再被包裝成未來。佢哋被買返嚟，只係因為陣容入面有具體工作需要有人完成。

至少睇落，呢個轉變係好事。

但如果車路士由「後生就係寶」突然轉成「老將就有Leadership」，咁只係同我改下標題當出咗PO一樣，係懶惰而無長進。年齡唔會自動帶來智慧，贏過冠軍亦唔代表放入任何體系都適用。

軒達臣值得簽，唔係因為佢36歲，而係阿朗素手上可能有一個清楚場景，可以使用佢仍然剩低嘅能力。

所以呢單轉會真正考驗嘅唔係軒達臣，而係車路士係咪終於學識先設計角色，再尋找球員。

如果體育總監真係先睇清楚陣容缺口，再替阿朗素搵到兩張功能明確嘅R卡，呢兩單轉會可以係組軍思維開始成熟嘅證據。

如果只係發現更衣室太後生，就一次過落Order買兩個阿叔，咁車路士唔係開始識得砌Deck，只係由幼齒池轉去抽老人池。

真正需要證明自己係Right Person嘅，唔係軒達臣同韋碧克。係落Order嗰班人。