【Re：球探報告】巴高一年後真係上車 當初叫佢完全體有無吹大咗

當時摸到嘅，究竟係邊一忽？

第一樣，呢樣一定無錯，巴高已經唔再係一個普通左閘。

白禮頓時期嘅佢，最大賣點係

技術同膽量。鍾意攞波、敢向前推進，左腳亦有一定創造力；但無波在腳嗰陣就勁牙煙，企位、判斷同對抗全部睇到人標冷汗。你可以話佢有天份，但點睇都似一件未砌好、說明書又唔見埋嘅零件。

去到史堡，教練索性將佢推入中場。結果好似終於有人搵返本說明書：巴高開始由中後場負責推進、轉邊同送出最後一傳，甚至接管球隊一部分組織工作。

所以我當時嘅判斷，並唔係「呢個左閘傳波幾好」，而係巴高嘅真正身份，可能根本就係一個借咗左閘身體出世嘅Playmaker。

同古古相比，呢個分別更加明顯。古古收入中路，主要係幫球隊保持平衡，安全咁將個波由後場運上去；巴高收入中路就唔係為咗穩陣，而係想直接搵位落刀。

第二樣摸到嘅，就係佢嘅防守確實進步咗。

由白禮頓時期一撞就散，到史堡突然交出相當誇張嘅對抗同單防數據，呢個轉變唔係我幻想出嚟。當一個本身已經識組織、識推進、識創造機會嘅球員，連最大弱點都突然由紅字變成綠字，我自然會開始腦補佢嘅完全體形態。

去到呢度，其實我摸到嘅每一忽都係真嘅。巴高真係變成中場核心，真係有精英級創造力，對抗亦真係大幅改善。

真正出事嘅地方，係我見到三塊Puzzle全部都啱位，就太快當自己已經砌完整幅圖。

組織嗰邊，我反而睇少咗

完整一季之後，最先可以維持原判嘅，係巴高嘅組織能力。

25/26球季，巴高交出6.42 xA、創造38次機會，當中包括13次黃金機會，全部都排喺同位置球員最前列。

呢組數字最有意思嘅地方，唔係佢最後有4次助攻，而係實際助攻仲要比xA少。即係巴高唔係靠隊友射入幾球神仙波刷出靚數據；相反，佢持續將個波送到應該產生入球嘅位置，只係史堡班隊友大晒鬼浪費晒。

數據入面，13次黃金機會特別重要。

好多所謂「組織型」球員，傳球數字可以好靚，但實際只係喺中後場左右橫傳，掂足一百次波都未必真正傷到對手 (望向某個小跳步意大利人)。但巴高唔同，無論由左路斜傳入禁區、喺Half-space送直線，定係突然轉去弱側，佢嘅目的都唔係保持控球，而係直接將對方防線劏開。

不過，佢亦無因為踢得成熟咗，就突然變成一部只識安全駕駛嘅車。

佢嘅傳球成功率由82.1%升到86.3%，證明穩定性確實有改善；但過人成功率仍然只有41.4%，有時見到條窄路都照樣一腳隊入去，嗰種「我見到機會就一定要試」嘅性格仍然喺度。

只係而家嘅巴高，開始識得將風險用喺更值錢嘅地方。佢唔再係每次掂波都亂咁掟銀仔，而係將籌碼集中落真正有機會劏穿防線嘅一腳。

所以組織呢一邊，我當時唔止無睇錯，甚至係摸細咗。巴高唔係一個進攻幾好嘅左閘，亦唔只係另一款內收閘。佢係一個真正嘅Playmaker，只不過起步位置啱啱好喺左邊。

不過防守嗰邊，就無咁好彩喇。

防守嗰邊，我將局部當咗全貌

先講清楚，當時話巴高防守大幅進步，無錯，真係無錯。

25/26球季，佢每90分鐘贏得6.14次對抗，成功率57.4%，兩項都排喺同位置球員前列。至少對手真係埋到身嗰一下，巴高已經唔再係白禮頓時期嗰塊一撞就穿嘅思覺老師紙皮。

問題係，單防只係防守其中一部分。

完整一季之後再睇，巴高每90分鐘只有3.36次防守貢獻，屬同位置球員偏低水平；截球同解圍數字亦排得相當後。呢啲數字唔代表佢懶，始終一個主要負責推進同創造機會嘅中場，本身就唔會好似掃蕩型防中咁四圍填窿。

但反過來講，佢亦證明唔到自己係一個完整嘅精英防守球員。

真正完整嘅防中，唔只要埋身時搶得贏，仲要識得預判傳球路線、封鎖空間、保護禁區同處理第二點。巴高最強嘅係見到人、見到波之後嗰一下對抗；但喺危機發生之前，佢未必係最早察覺，亦未必係最穩定幫球隊閂門嗰個人。

全季5黃1紅，仲輸過一次十二碼，亦反映佢嘅判斷仍然有躁進嘅一面。不過見到有1紅，你就好有信心佢可以極速融入車仔嘅大家庭啦……

另外，舊文引用嘅「一對一攔截成功率85%」，同今次嘅57.4%對抗成功率並唔係同一項指標，唔可以直接當成一年間突然倒退。真正改變嘅唔係巴高，而係我手上多咗一整季資料，終於睇到單次對抗以外嘅部分。

所以呢度唔係推翻自己，而係……嗯少少修正。

巴高確實係一個對抗能力強、落腳唔差嘅組織中場；但佢唔係可以獨力保護防線、包辦所有善後工作嘅精英防中。當時我摸到佢皮厚，就以為成隻象都刀槍不入。

「精英級單防」仍然有討論空間，但「完全體」三個字，就要正式收返。

唔係完全體，先更加需要說明書

收返「完全體」三個字，唔代表巴高唔值得上車。球員極端本身唔係問題，真正問題係教練有無睇清楚佢極端咗乜春。

當年我分析巴高，出發點仍然係馬蛇嘅內收閘體系。但一年之後，馬蛇已經離開，巴高亦證明繼續叫佢做「識踢中場嘅左閘」，其實已經有少少本末倒置。

今日真正要問嘅，唔係佢可唔可以取代已經離隊嘅古古，而係沙比會將佢當成左閘、翼衛、中場，定係遊走三者之間嘅混合角色。

如果要求巴高好似傳統左閘咁沿住邊線上落，當然唔係用唔到。佢識傳中、肯推進，對抗亦足以應付邊路。但咁樣做，等於買咗把開山刀返嚟切生果，斬到係斬到，只係有少少浪費。

巴高最值錢嘅畫面，始終係由左路進入中場之後發生。佢可以喺較後位置接波，再用長傳轉去弱側；亦可以喺左邊Half-space搵直線或者斜傳劏入禁區。佢需要嘅唔係一條固定邊線，而係足夠自由度去揀角度落刀。

但既然佢唔係一個會自動封鎖空間、執齊所有第二點嘅防中，身後就必須有人幫佢閂門。可以係左中堅拉闊補位，亦可以係另一個中場留後保護。總之，唔可以一邊要求佢負責劏開對手，一邊又幻想佢可以瞬間回防，順手執埋自己留下嘅空位。

所以巴高最合理嘅定位，唔係古古嘅後備，亦唔係卡些度嘅替身。佢更加似一個由左路起步嘅進攻型中場，一件可以隨住控球階段改變位置嘅特殊武器。

去到沙比手上，與其將巴高塞返入左閘個框，不如直接承認佢最接近嘅身份，本身就係Playmaker。

佢唔係萬能插頭，但只要接啱條線，巴高可以提供嘅創造力，偏偏又係而家車路士陣中無乜人能夠複製。

球探報告，從來唔係預言書

寫球探報告最令人上癮嘅地方，就係想比其他人早一步睇到球員會變成點。但球員唔係一條寫好晒嘅成長曲線，報告亦只係某個時間點，用有限證據影低嘅一張相。

真正值得重睇嘅，唔係當年有無估中轉會，而係當新證據出現，我哋仲肯唔肯承認張相影唔到嘅地方。舊判斷有根據，唔代表永遠唔使改；後來發現缺口，亦唔代表當初睇到嘅全部都係錯。

一年之前，我摸住半隻象寫低答案。一年之後，隻象行近咗少少，輪廓自然同想像有出入。但巴高真正會變成一個點樣嘅球員，其實到今日仍然未有最終答案。

嗯，我幫自己答辯嘅部分差唔多，希望巴打們高抬貴手，唔好再cap返我舊文出嚟鞭屍，THX。

姑且睇下巴高上車之後，踢唔踢得返史堡嘅實力……又或者會唔會變成第二個黑工山度士。