【車迷觀點】梅迪歷重獲自由之後 必須越過嘅困難同高牆
呢篇，又係我深夜發作寫出嚟嘅文。梅迪歷禁賽結束，上一文我已經將成單案拆到連WADA份技術文件都譯埋，其實真係無咩好再深究。但當四周靜落嚟，我個腦仍然停咗喺梅迪歷身上。
講明，我唔係Gay，老實講，我唔算好鍾意梅迪歷。佢唔係我最欣賞嗰類球員，見到佢帶甩個波、射上觀眾席、去到最後三分一突然腦斷線，對住阿仙奴又口出狂言，我一樣照笑、照鬧，從來無特別留手。
但唔知點解，每次真正慢落嚟寫佢，筆觸總係會有少少唔同。
可能係因為自己嘅人生都唔算一帆風順，所以見到一個同樣被命運推落谷底、明明已經好努力掙扎，卻仍然唔知幾時先爬得返上嚟嘅人，總會忍唔住望多兩眼。唔一定因為鍾意佢，只係希望佢捱得過，證明人生遇到幾多唔如意，靠努力仍然可以行出另一條路。
英足總解除咗梅迪歷嘅禁賽，還返佢踢波嘅自由。新聞稿一句「即時恢復參賽資格」，睇落就好似監倉大門終於打開，呢場折磨亦正式完結。
但行出監倉、返到屋企，唔等於真正得到自由。前面仲有一道又一道高牆，等住呢個接近20個月無踢過正式比賽嘅人逐道爬過去。
第一道高牆：有操練，唔等於準備好踢波
之前我有寫過，禁賽期間，梅迪歷無放棄過自己。
佢唔可以入車路士訓練場，亦唔可以
接受球會職員指導，於是自己出錢請私人教練、租用Uxbridge FC球場，甚至請龍門陪練。之後再去奧地利開訓練營，流出嘅片段入面，佢仍然跑得、扭得、射得，至少無任由接近20個月將自己由職業球員變成普通人。
但足球員嘅體能，從來唔係身形無走樣、跑得快就代表準備好。
私人訓練可以控制每次衝刺、動作同休息時間；真正比賽就唔會就住你。急停、轉向、碰撞、迫搶，再拖住疲勞嘅身體作出判斷，呢種負荷唔係對住雪糕筒同攝影機可以完整複製。
梅迪歷可能保住咗最引以為傲嘅速度，但能唔能夠連續90分鐘承受頂級比賽，無人知道。佢最缺少嘅唔係訓練，而係十個會逼佢去到極限嘅對手，同十個需要佢配合嘅隊友。
佢努力保住咗自己副身體，但要重新變返一個可以落場比賽嘅球員，呢一道牆，仲要係最矮嗰一道。
第二道高牆：比賽節奏，唔會停低等佢
就算副身體捱得住，雙腳同個腦亦未必記得點樣比賽。
梅迪歷最後一次正式上陣，已經係2024年11月對海登咸。長期無比賽，失去嘅唔止係落場時間，仲有球員對空間、壓力同危險嘅直覺。
私人訓練入面，佢大概知道個波會由邊度傳過嚟、下一步要做啲乜；真正比賽入面，空位可能只存在半秒。對手一貼近、隊友突然改變走線，原本準備好嘅答案就要立即推倒重來。
偏偏呢啲一直係梅迪歷最需要改善嘅部分。
佢從來唔缺速度同天賦，真正拖住佢嘅，係去到Final 1/3之後，幾時傳、幾時射、幾時繼續推進嗰一下判斷。呢種能力唔會因為一個人射多幾百球就自動升級，只能靠真實對抗、犯錯同修正慢慢磨出嚟。
東拿利停賽10個月期間仍然可以跟紐卡素操練，復出前亦踢過閉門賽；即使係咁，賀維仍然預計佢需要大約一個月先回到最佳狀態。梅迪歷停得更耐，亦無呢啲緩衝。
當其他球員不斷累積經驗，佢只能停留喺原地，努力保住離開前嘅自己。但時間唔止無停低等佢，仲將佢熟悉嘅足球世界一併帶走。
第三道高牆：球隊已經換咗一套玩法
梅迪歷離開嗰陣，車路士仍然由馬蛇執教；到佢獲准復出，羅生已經嚟過又走埋，坐喺教練席嘅人變成沙比。
沙比嘅戰術，唔係簡單喺陣容表左邊搵個空格，再將梅迪歷個名放落去。進攻中場要識得喺half-space接應、轉身、串連；邊線球員就要包辦闊度，反覆上落兼處理防守。幾時拉邊、幾時切入中路、失去控球後由邊個首先迫搶，全部都有指定答案。
偏偏梅迪歷過去最擅長嘅，係企闊少少，利用速度直接衝擊對手。佢可以改造成左邊進攻中場、退後變成翼衛，抑或只適合球隊轉打反擊時後備上陣，全部都要重新試過先知。
其他球員至少已經一齊經歷Pre-season、團隊操練同熱身賽；梅迪歷就連最基本嘅戰術課堂都要由第一頁追起。
體能可以靠訓練追回，比賽節奏可以靠上陣適應。但如果搵唔到新體系入面嘅位置，就算梅迪歷仍然跑得同以前一樣快，亦未必知道應該跑去邊。
第四道高牆：桃花依舊，人面全非
就算梅迪歷學識沙比套戰術，佢仲要重新認識身邊每一個人。
佢最後一次代表車路士上陣，正選隊友係祖根遜、迪沙施、托辛、巴迪亞舒尼、維加、卡沙迪亞、KDH、辛祖、安宮古同古爾。去到今次亞洲巡迴名單，十個人入面只剩返托辛。
車路士嘅人腳早已面目全非。佢而家要合作嘅，係基頓斯、艾斯迪華奧、昆達、祖奧柏度、戴納同羅渣士，一班從未同佢踢過比賽嘅新隊友。
足球場上嘅默契，唔係互相Follow Instagram就會自動生成。隊友幾時想要波落腳、幾時會overlap、幾時準備攻前柱，全部都要靠操練同犯錯慢慢建立。
更何況，呢班新隊友亦係佢爭取上陣時間嘅直接對手。當梅迪歷仍然要追趕體能、節奏同戰術，其他人已經早一步向沙比證明自己。
所以，外借史特拉斯堡未必係再次流放，反而可能係最人道嘅復健方法。相比立即同一班已經起跑嘅人爭位，先喺壓力較低嘅環境重新適應比賽，或者先係真正俾佢一次機會。
監倉門已經打開，門牌亦仍然寫住Chelsea。但梅迪歷返到嘅屋企早已重新裝修過幾次，甚至未必再有一間房預留俾佢。
刑期完咗，真正嘅復出先啱啱開始
寫到呢度，可能有人會問：咁多道高牆，梅迪歷仲有無可能爬得過？
老實講，我答唔到。
英足總可以用一紙判決還返佢參賽資格，卻無辦法將被偷走嘅時間一併歸還。但我仍然相信，梅迪歷值得一次真正嘅機會。
所謂機會，唔係8月24日立即將佢塞入正選，再用三場波、幾次帶甩同幾腳飛機判佢生死；亦唔係因為佢經歷悲慘，車路士就有義務無限期等落去。而係俾佢合理時間重新適應職業球隊，再睇清楚佢仲可以成為一個點樣嘅球員。
如果最後答案係外借史特拉斯堡，甚至最終無法喺車路士搵到位置，亦唔代表呢次復出失敗。返唔到原本嗰間房，可能就要行出去，重新搵另一個容得下自己嘅地方。
人生從來唔係努力過，就一定可以攞返原本應得嘅結果。有啲時間失去咗就係失去咗，有啲高牆亦未必真係爬得過。但重獲自由嘅意義，或者從來唔係保證你可以沿住原路行返去，而係終於有資格再揀另一條路。
監倉門已經打開。梅迪歷嘅刑期正式結束，但屬於佢嘅足球生涯，先啱啱重新開始。