【戰術覆盤】車路士1：2熱刺 沙比首次上高速就炒車

諗法頂得住，對抗未得

沙比今場大致沿用上場嘅組織方式。車仔控球時，

拉維亞會向左邊外推，哈圖就由左閘位置內收，同中堅拉開成五人第一線。艾素高就游走成條中場線，負責掃蕩同第一時間向熱刺持球者施壓。

單睇頭十幾分鐘，呢套諗法其實算頂得住。車路士逼搶力度唔低，熱刺亦無乜真正威脅到防線；但要話場面五五波又有少少勉強，因為車路士雖然守得住，進攻就未算入肉，兩邊都搵唔到缺口，但熱刺明顯踢得更從容。

差別就出喺對抗強度。拉維亞復出表現對辦，幾次接波、轉身同帶球推進都證明佢有能力將個波由後場帶生；但佢加艾素高對住東拿利同加拉加，中場硬度始終輸蝕。尤其艾素高，上場對住西悉尼可以搶完再慢慢傳，今場熱刺一埋身就唔俾佢舒服處理，表現立即狼狽咗好多。

上半場約83%傳球成功率亦反映到問題。唔係每次都有人傳失，而係好幾球傳嗰個以為隊友會走位，接嗰個又完全無呢個意思。

到呢個位，睇得出架車嘅零件大致裝啱位置，但一踩快少少，唔同零件之間就開始有吱吱聲發出…

兩球折射，反映出兩種精神面貌

架車響咗無耐，第一粒螺絲就真係鬆咗。17分鐘，艾素高喺中場失去控球，熱刺反擊，加拉加隨即向前插，車路士後防唔追又唔得，結果禁區頂被拉空，俾東拿利有空間起腳。射門省中高維爾改變方向，車仔門將舒曼路維完全反應唔切，車路士就此落後。

呢球有折射成份，但又唔可以全部推俾運氣。由中場失去控球，到無人及時填補禁區頂，熱刺只係一次簡單前插，就將車路士幾個仍未磨合好嘅位置全部扯開。

不過，同上季下半季唔同，今次失波之後，班球員無流露出「又嚟喇，今場追唔返㗎喇」嗰種氣氛。幾分鐘後，拉維亞先喺後場自己扭過對手，將個波帶生再交上前；哈圖入侵Half-space拉開空間，基頓斯先有位置喺左邊傳中。

我本身係自己筆記度先寫完兩翼未製造到威脅，點知基頓斯就即刻用個傳中打我臉。個波省中賓戴維斯再飄去後柱，過程的確有少少運氣，但拉維亞點樣破壓、哈圖點樣走位、二安點樣甩開羅拔臣攝到後柱，全部都係有意識嘅進攻。

一球折射令車路士落後，另一球折射就幫車路士追平。運氣一人一啖，但沙比車失波後無斷電散架，先係兩球之間最值得留意嘅分別。

唔係拆唔開，只係射唔入

49分鐘，丹素領紅，熱刺等於突然讓出條快線，俾車仔可以上高速踩盡油門。由原本連主導權都搶唔實，變成長時間圍住熱刺禁區進攻。

打多一人嘅車仔亦唔係齋喺外圍慢駛。祖奧柏度帶住前場運轉，左路亦幾次成功落底傳中；二安先接應祖奧柏度傳送起腳，被堅斯基神反應救出，之後車仔前場搶返控球，二安再次獲得單刀機會，但又過唔到同一個人。其後彭馬禁區內射門被封，祖奧柏度亦有近門起腳被救。

所以問題唔係車路士拆唔開十人熱刺嘅防線。無論靠邊路落底、前場反搶，定係趁對方未企穩直接衝入禁區，車仔其實製造到足夠機會。只係熱刺守將封鎖射門路線做得好，堅斯基又突然上身，硬係將成條高速公路封到得返一條罅。

當然，龍門上身係一回事，車仔自己射唔入又係另一回事。製造機會呢份功課算合格，但架車油門就算踩到底，去到堅斯基面前仍然要急煞。唔係拆唔開，只係由門前去到入網嗰幾米，過唔到就係過唔到。

換完零件，連記憶都換走埋

去到80分鐘，沙比一次過換入大批後備同年輕球員。熱身賽本身就係用嚟驗貨同分配上陣時間，呢個安排無問題；但奇怪嘅係，架車換完零件之後，好似連架車嘅導航系統都換走埋。

換人前，車仔至少知道邊個向前壓、邊個留後保護、失去控球之後又由邊個執漏。換人後，成隊波嘅站位同工作分配變得鬆散。熱刺明明少打一人，反而接連搵到反擊空間，甚至兩度射中門柱。

到補時階段，熱刺再次由後場反擊。第一腳起腳後，沙亞同安瑟明路都無跟實李察李臣，結果中柱之後就俾佢趕到門前執雞絕殺。呢球唔係純粹黑仔，而係車仔由限制第一腳射門，到追蹤第二點都做得唔完整。

當然，臨時將一批年輕球員砌埋，無可能要求佢哋立即運作得好似原裝出廠咁。但換完零件之後，架車連自己應該行邊條線都唔記得，呢個就係沙比要由今場帶返訓練場處理嘅另一份功課。

總結：友賽唔使判死刑，只負責驗車

Well，講到底，沙比當然未需要Out，Blue Co Project亦未至於因為一場熱身賽就宣告破產。相反，今場輸得幾合時。上場對住西悉尼，架車慢駛之下都可以撞開對手完全無問題；今場一踩上英超嘅速度，對抗、埋門同換人後嘅分工就全部露晒底。

至少，套骨架證明係有得砌。拉維亞可以將個波由後場帶生，哈圖、基頓斯同二安嗰次配合亦見到進攻雛形；即使失波，班球員都無即場死機。問題係去到真正英超強度，條中場仍然唔穩；即使多打一人製造到足夠機會，架車亦始終衝唔過堅斯基；到大量換人之後，連最基本嘅防守分工都一齊消失。

贏波負責令人開心，輸波就負責將問題放大。熱身賽從來唔需要怕輸，反而係贏完之後以為自己已經無嘢要改，咁更加可怕。

真正要判沙比生死嘅唔係今日個賽果，而係去到正式開季，當架車再次踩盡油門，今日發出吱吱聲嗰幾粒螺絲，究竟收緊咗未。

下場，喺香港再講。