【戰術覆盤】西悉尼流浪者 3：2 車路士U21 西悉尼流浪者 1：4 車路士

有戰術骨架，但幾個一隊球員要返去補課

講明，呢場波只係友賽，我無諗住用平日嘅框架去寫，只係想將自己所見所想匯集成文。而頭一個鐘，其實唔係完全無嘢睇。

沙比排出嘅名義陣式係4-2-3-1，禾殊踢10號，薩特帕耶夫同閃電麥昆分居兩翼，戴納頂喺最前。但去到無球階段，防線

唔係固定四個人平排企。艾素高會由防中橫移落閘位協防，將後場拉成三人結構；搶返個波之後，佢又會由低位接手，嘗試自己帶過西悉尼第一條壓迫線。

個概念其實幾清楚。沙比想利用艾素高嘅覆蓋範圍幫班年輕守將補窿，同時將防守同推進兩份工作都交俾佢。問題係，當全隊嘅傳接速度、走位默契同判斷未去到同一水平，個結構間中可以打穿對手，卻無辦法長時間穩定運作。

不過，班U21唔係純粹落場做人肉背景板。開賽6分鐘，車路士由自己禁區開始組織，閃電麥昆轉身擺脫壓迫後，一腳將個波送入對方半場。薩特帕耶夫由左路高速攝入身後，接波後無拖泥帶水，殺入禁區就直接抽過門將。

呢球由後場傳控、擺脫第一重壓迫，再一腳打穿防線，正正係頭一個鐘入面少數真正完整執行到嘅進攻。薩特帕耶夫個走位、速度同埋門亦交足功課。戴返頭盔，對手只係澳職包尾，但17歲仔第一次代表車路士上陣，第一次真正機會就射入，不枉我留意咗佢咁耐，點都值得寫下。

而喺幾個被塞入U21陣容嘅一隊球員入面，艾素高就係最交到功課嗰個。佢幾次由後場完成攔截，再直接轉身推進；追成2：2嗰球，佢由中路後上，同禾殊完成撞牆配合，再冷靜射入遠柱。沙比俾咗佢幾份功課，佢基本上逐份交齊。

反而另外幾個一隊球員，就真係各有各精彩。

邦仔踢中堅，第二個失波正正暴露咗佢嘅單防判斷。對手正面挑戰，佢出腳時間錯咗，一下就被完全呃過。以往踢右閘，被人過咗後面尚且有中堅包位；今次自己就係最後嗰層，一次錯判就直接打開成條防線。

托辛，Aka賭神，理論上應該係班細路身邊最穩陣嗰個，結果33分鐘差啲親手交個波俾對方射入，進攻端又兩次面對近乎空門嘅機會都頂唔入。你話佢無出現咩，又唔係；問題係每次出現，好似都準備整啲嘢俾大家嘆咁款。

戴納就更加麻煩。對住澳職對手，佢本來應該用身體、背身能力同走位帶住班細路踢，至少幫前場建立支點。佢唔係完全無射門，但車路士兩個入球主要都係靠小將同中場自己打出嚟，喺接駁、拉扯同禁區威脅上存在感始終不足。

所以頭段落後2：3，問題唔係沙比無擺低任何戰術。三後變形同艾素高嘅角色，都睇到少少實驗方向；薩特帕耶夫個入球亦證明班小將有能力將套嘢執行出嚟。真正荒謬嘅係，班U21大致踢返U21應有嘅水平，幾個被塞入去帶隊嘅一隊球員，反而踢到似係U21咁款。

63分鐘解除限制器，成場波突然快咗一倍

去到63分鐘，沙比一口氣換入九名球員，包括彭馬、祖奧柏度、二安、基頓斯、高維爾同科芬拿等一隊球員。然後同一個球場，突然出現咗另一場波。

由九人入替到完場，短短27分鐘，車路士轟入四球；祖奧柏度更加只用九分鐘完成帽子戲法。呢個唔止係換咗幾個比較出名嘅球員，而係成隊波嘅處理速度同攻擊效率突然跳咗一級。

最明顯嘅分別唔係名氣，而係每一個動作都快咗。傳波力度、接應時間、無球走位，以至失去球權後第一步反應，全部提升咗唔止一級。頭一個鐘，車路士好多時要等隊友企定、望清楚，再決定個波下一步去邊；換人之後，接波嗰個未轉身，前面已經有人開始走位。

西悉尼踢咗一個鐘後體力開始跌，本來勉強追得上嘅壓迫同補位，再遇上突然加速嘅車路士，轉眼就變成周圍救火。沙比喺場邊亦不停嗌 Push！Push！Push。本身只係一場提升狀態嘅熱身賽，但睇佢個款，顯然唔打算接受自己第一場波輸。頭一個鐘放水放到差啲浸死自己，最後唯有將成班主力掉落去執手尾。

不過，兩批球員唔只係質素有分別，踢法上亦唔完全係同一份功課。頭段由艾素高橫移補入防線；換人之後，名義上踢左閘嘅安瑟明路，實際位置更似三中堅入面嘅左中堅。真正喺左路周圍走、後收接應，再不時移入中路嗰個，反而係半場入替艾素高嘅16歲中場MNJ。

MNJ無乜搶鏡畫面，但佢活動範圍相當大，會移去左邊幫手接波，再向中路連接彭馬同前場。至少喺呢27分鐘，佢嘅走位令左路唔需要由安瑟明路單獨負責推進，基頓斯亦可以留喺更前位置準備攻擊防線。

呢啲變化值得繼續留意，但面對一條已經開始散嘅防線，車路士暫時未需要靠完整體系慢慢拆。連續幾次成功擺脫，再加一次快速轉向，單靠主力球員嘅處理速度，已經足以將比賽搶返嚟。

彭馬慢咗，車路士反而快咗

上季季尾嘅彭馬有少少急躁。隊波踢唔出、前面又無人解決問題，佢好多時一拎波就想自己加速、自己劏、自己完成最後一下。結果愈想將成隊波推快，處理反而愈急，連自己都一齊跌入混亂。

今場嗰27分鐘，佢就定得多。

彭馬唔係長期黐住右邊等波，而係不斷墮到中圈附近接應。西悉尼中場唔跟，佢就可以舒服轉身；一有人跟出嚟，佢又可以用第一下控球同轉身擺脫，直接帶走對方其中一個防守點。

最明顯就係佢劏穿防線俾祖奧柏度嗰腳直線。彭馬接波後無急住死推，先將對手引到身邊，再一腳穿過西悉尼中後場之間嘅空位。祖奧柏度入攝、接應、完成埋門，成個過程無花巧，但每一下都比對手快半秒。

而呢半秒，就係頭一個鐘最欠缺嘅嘢。

更直接嘅分別係，車路士反先嗰球唔係靠彭馬自己扭入禁區，而係佢喺較後位置等對手靠近，再用一腳直線將祖奧柏度送入最舒服嘅埋門區域。

彭馬墮後，迫使對方中場跟出；祖奧柏度再拉住中堅，基頓斯同二安就唔使企定定同對手單挑，可以開始向空位走。彭馬自己慢落嚟，等對手先失去耐性，車路士反而更快去到禁區。

戴返頭盔，季前第一場嘅27分鐘，未足以證明彭馬已經完全擺脫上季季尾嘅急躁。但至少喺呢27分鐘，我哋見到嘅唔再係一個心急到想自己救晒成隊波嘅彭馬，而係一個識得控制節奏，再等隊友將空間變成威脅嘅彭馬。

祖奧柏度接通前場，兩翼終於有路可走

同頭一個鐘嘅戴納相比，祖奧柏度帶嚟嘅分別，唔止係一個入到波、一個入唔到波。

戴納離開禁區，往往只係令禁區少咗個人；祖奧柏度墮後，就會將對方中堅一齊帶出嚟，再等彭馬、基頓斯或者二安入攝身後。對方中堅唔跟，佢有空間轉身；一跟出嚟，身後就即刻有人走入去。簡單講，佢每一次移動都有下文。

呢個亦令兩翼終於唔使各自為政。基頓斯喺左路負責拉闊同攻擊禁區，祖奧柏度一拉走中堅，佢就有空間由外線切入。車路士追成3：3嗰球，祖奧柏度自己連過三關後回傳，基頓斯無留喺邊線睇戲，而係準時入攝禁區完成埋門。

基頓斯今場未必有二安咁多搶眼鏡頭，但佢至少令車路士兩邊都有人可以直接向防線施壓，唔再將所有威脅塞晒去右邊。

二安就更加直接。佢幾次都走到正確位置，亦有一次由右路一扭三殺入禁區起腳；最後亦係由佢開出角球，科芬拿頭槌被擋，再由祖奧柏度執雞完成帽子戲法。

當然，78分鐘嗰腳回傳派膠，無得解釋。嗰球完全係自己判斷錯誤，直接送對方入禁區追返一球。但派膠係派膠，唔代表要將之前做啱嘅嘢一筆勾銷。佢今場證明咗自己仍然可以突然短路，亦證明即使入唔到波，仍然可以成為右路最有威脅嗰個。

祖奧柏度最後交出3入球1助攻，固然有對方防線鬆散嘅加成，但佢最重要嘅作用，係將彭馬、基頓斯同二安串埋一齊。戴納頭一個鐘踢完，令人問：「個9號去咗邊？」

祖奧柏度落場之後，就算佢離開咗9號位，你仍然知道佢點解會喺嗰度。

總結：球星返咗嚟，球隊仲砌緊

最後27分鐘轟入四球，至少證明當車路士將真正嘅一隊球員擺返落場，兩邊嘅個人質素根本唔係同一個級數。

但如果要用呢27分鐘宣布沙比嘅車路士已經正式上線，我又覺得有少少心急。

頭後兩批球員踢緊嘅結構並不完全相同，對手去到一個鐘後亦明顯腳軟。沙比仲喺試零件、試位置、試邊幾個人擺埋一齊先至通電。呢個唔係批評，季前第一場友賽本身就應該用嚟試，而唔係用嚟交功課。

至少佢見到薩特帕耶夫有速度同埋門，艾素高可以兼顧防守同推進；換人之後，MNJ亦提供咗一個幫左路接駁嘅流動中場角色。再向前望，彭馬墮後可以控制節奏，祖奧柏度仍然係前場最重要嘅接駁位，基頓斯可以由左路提供另一個攻擊點，而二安就算間中斷線派膠，威脅依然存在。

63分鐘後，傳接、走位同埋門的確全部似返一隊。但真正返咗嚟嘅暫時係球星，完整嘅車路士仲喺砌緊。

下場波，再繼續研究。