【戰術覆盤】車路士 3：0 AC米蘭　沙比發力迫害艾摩廉

3-4-2-1終於現形，但離「練成」仲有段距離

先答返上面講嘅嘢：唔係我估錯帕利斯查踢左閘，而係沙比今場根本無打算擺四後衛。

艾殊邦、科芬拿同哈圖組成三中堅，帕利斯查同尼圖分居兩翼；拉維亞、卡些度守住中路，彭馬同祖奧柏度就收埋喺韋碧克身後。成個陣攤開嚟，就係相當正宗嘅3-4-2-1。

但陣式本身唔係最重要，重點係呢班人終於識得點樣走位。

帕利斯查同尼圖將球場闊度拉到最盡，彭馬、祖奧柏度毋須再黐住邊線，可以直接走入中路接波。當兩個10號內收，米蘭中場就要決定跟唔跟：唔跟，佢哋就可以喺兩線之間轉身；跟入去，兩邊翼衛又會得到空位後上。上場車仔好多時係有人攞波、無人開路，今場至少開始見到每個人一郁，身邊就會帶動另一條傳球線出現，而且企位亦比之前更緊密。

最明顯嘅分別，係車仔今場終於敢由中路劏入去。拉維亞或者卡些度將波送入兩線之間，彭馬、祖奧柏度背身接應，一轉身就嘗試用直線打穿米蘭中場。未必次次都去到射門，但好幾次都成功將個波由後場直接送入進攻三區，而唔係例牌傳去邊線，再大家企定定等奇蹟發生。

不過，講「現形」可以，用「練成」兩粒字就明顯太早。

正選階段嘅進攻結構係清楚咗，但運轉仍然未算流暢。彭馬同祖奧柏度有時會走入相近位置，韋碧克亦未完全融入身後兩個10號嘅配合；上半場大部分時間，車仔雖然知道條路應該點行，真正一腳劏穿米蘭防線嘅次數仍然唔多。結果第一個入球亦要等到補時，靠角球先打開缺口。

所以今場所證明嘅，唔係沙比已經將利華古遜嗰套踢法完整搬咗過嚟，而係車仔終於砌出一副睇得明嘅骨架。至少相比之前一堆球員各自搵位，今場開始見到各種化學反應。

活動範圍大到痴孖根，拉維亞其實做緊乜？

今場其中一個神蹟，發生喺拉維亞身上。感謝主，佢居然可以踢足90分鐘，呢次亦係佢首次為車路士踢足，我有理由相信二安帶咗佢去自己教會。

但更神奇嘅係拉維亞今場嘅表現。

名義上，佢

同卡些度排成雙中場；但實際踢落，拉維亞根本無一個固定位置。後場開始組織時，佢會主動走近三中堅接波；當個波成功推過第一線，佢又會跟住向前，走入中場甚至進攻三區，繼續做下一個接應點。難怪我成場睇住佢由後面行到前面，再由前面走返後面，懷疑佢係咪偷偷地帶咗個替身落場踢多個咁。

拉維亞亦唔係為走而走，佢每次移動都係為咗將兩段本來斷開嘅進攻重新駁埋。

當三中堅攞波，佢會落去提供一條安全傳球線；當彭馬或者祖奧柏度喺兩線之間接應，佢又會移前靠近，令對方轉身之後唔使孤零零自己處理。就算前面條路突然塞住，個波亦可以交返俾拉維亞重新分配，而唔係一下子打返落三中堅，成套進攻由頭嚟過。

數據亦幾能夠反映呢個角色。拉維亞全場60次傳球成功58次，成功率接近97%，6次長傳更加全部成功。齋睇成功率，好容易以為佢只係喺後場猜猜猜刷數據；但配合佢由後場一路移上前場嘅活動範圍，意思其實係無論車仔將個波推到邊一層，附近幾乎總會搵到佢。

6次長傳全中亦相當重要。當米蘭開始向一邊收窄，拉維亞唔需要再逐格逐格慢慢搬，可以直接將個波轉去另一邊，等翼衛趁對手未企穩就繼續向前。佢今場最有價值嘅唔係某一下神來之筆，而係令每一段進攻之間少咗停頓。

而佢亦唔係淨係有波嗰陣周圍出現。8次奪回球權、地面對抗6次贏4次，反映拉維亞無波時同樣有參與回收。尤其車仔進攻斷纜之後，畫面上往往亦見到佢第一時間追返個波。呢點對3-4-2-1尤其重要，因為兩邊翼衛一推高，中路一失球權，身後空間可以大到足夠俾對手開生日會。拉維亞能夠及時回收個波，先令成隊可以繼續企喺前面圍住米蘭砌。

當然，戴返頭盔，AC米蘭今場嘅壓迫強度實在未算高，拉維亞去到英超面對更快、更惡嘅中場，仲可唔可以咁自在咁周圍駁線，仍然要再睇。但至少今場證明咗一件事：健康嘅拉維亞唔止係另一個防守中場，而係可以成為成套戰術入面嘅人肉尿袋。

至於尿袋兩邊駁住邊個？就係一個本身踢右閘、今場突然走去左邊爆；另一個明明係翼鋒，卻由後場包辦到前場嘅兩隻翼衛。

同樣係翼衛，兩邊做緊嘅完全唔同

拉維亞負責喺中間駁電，帕利斯查同尼圖就負責將成個陣拉開。

表面上，兩個都係3-4-2-1入面嘅翼衛；實際踢落，兩邊唔係倒模鏡射出嚟。帕利斯查負責直接向前爆，尼圖就要由後場包辦到前場，用兩種唔同方式撐起車仔兩條邊。

先講第一次喺車仔踢左邊嘅帕利斯查。佢本身慣踢右閘，今場調去左翼衛之後，無因為逆足而踢得縮手縮腳，反而成為正選階段最直接嘅推進點。每次左路出現空位，佢第一個反應唔係停低再交返後，而係帶住個波向前衝，甚至幾次直接一對一突破米蘭守衛。

呢種跑法對今場車仔相當重要。祖奧柏度內收之後，左邊幾乎成條走廊都留咗俾帕利斯查；佢只要肯向前推，米蘭右翼衛就唔可以放心收窄幫手封中路。換句話講，即使帕仔最後一腳未必次次交到貨，單係佢夠膽帶住個波衝，都已經可以將對手防線扯開，為祖奧柏度同拉維亞騰出活動空間。

右邊嘅尼圖就係另一種玩法。

佢今場無好似普通翼鋒咁頻繁內切入禁區，更多時間係留喺外線，防守時落返去組成五後衛，攞返個波就沿住右路推上前。呢個角色無帕利斯查咁搶眼，甚至有段時間會令人覺得佢離個龍門遠咗，少咗最擅長嗰種直接威脅；但由另一個角度睇，尼圖亦證明自己唔係一定要入禁區先有用。

第二球就係最好例子。尼圖喺右路得到空間，無多餘動作，直接送個內彎波去遠柱，祖奧柏度走到尾柱完成任務。成個配合非常簡單，但正正係3-4-2-1想製造嘅畫面：雙10號將對手吸入中路，翼衛喺外線得到時間，再由一邊直接搵另一邊嘅禁區接應點。

所以今場兩翼值得留意嘅，唔止係「帕仔踢左、尼圖踢右」呢種簡單排陣，而係沙比無要求兩個翼衛用同一套說明書。帕利斯查負責用速度同帶波將場波向前推，尼圖就負責控制成條右路，再用傳中完成最後一腳。角色唔對稱，但功能啱啱好互補。

當然，帕利斯查嘅最後一腳仍然有改善空間；尼圖長期踢翼衛，防守消耗會唔會削弱佢最有威脅嘅爆發力，呢啲都要再觀察。至少今場證明，沙比手上唔一定要有兩隻一模一樣嘅翼衛，先至砌得出呢套陣。

兩個角球開齋，積臣後備再撳變速掣

兩條邊開始識得拉扯、中路亦終於有人接應，但車仔第一個缺口最後仍然唔係靠流動進攻打開。去到上半場補時，救場嘅反而係一個角球。

第一球由卡些度主踢，車仔先用一班人塞入小禁區，擺出副準備圍毆龍門嘅姿勢，將米蘭守將注意力全部拉入門前。到個波真正開出，祖奧柏度反而喺混亂之中得到起跳空間，一頂將車仔送到領先。表面睇係一個普通角球傳中，實際上真正做到嘢嘅，係開波之前已經將對手視線同防守位置呃走。

如果話第一球仲可以當係門前混戰執到，第三球就更加似一早畫好條路線。

今次轉由拉維亞主踢，無再將個波掟入小禁區鬥人多，而係直接送去禁區頂。卡些度喺無人干擾之下，用外腳背窩利撞入。由助攻祖奧柏度，到自己喺禁區頂完成射門，卡些度一場波承包晒角球嘅送貨同收貨服務。

友賽兩下死球當然未足以話全部係Austin MacPhee功勞，但至少呢兩球唔係同一招撞彩撞中兩次。兩個主踢者、兩個攻擊區域、兩種完成方式，一球靠門前走位製造空間，一球直接伏兵禁區頂。新死球部門係咪已經正式開張，仲要再觀察；但第一批交出嚟嘅功課，至少唔似臨時抄返嚟。

而去到後備階段，車仔又展示咗另一種變化。

積臣入場之後，成隊波明顯踢得更加直接。前面有一個肯向身後空間衝、亦有速度將防線向後扯嘅中鋒，後場同中場就毋須每次都逐格慢慢駁。昆達等後備球員亦開始更早向前送波，積臣自己最後更有一次射中門框。不過好彩唔入咋…如果呢球入到，我會唔熟悉眼前呢個積臣。

呢段最值得留意嘅，唔係積臣有無能力爭正選，而係同一個3-4-2-1，換一種中鋒就可以有另一種鋒味。韋碧克正選時，車仔較多透過雙10號同中場慢慢接駁；積臣入場，就可以由組織模式直接轉成背身鳩跑。陣式無變，進攻速度同路線卻可以完全唔同。

總結：係虛火定真材實料

所以返到最初嗰條問題：係AC米蘭仲放緊假，定係沙比套3-4-2-1終於練成？我嘅答案係，前者肯定幫咗唔少，但後者至少第一次砌到連球盲都睇得明。

今場有清楚嘅三中堅骨架，有雙10號內收，有兩隻功能唔同嘅翼衛，亦有拉維亞喺各層之間走嚟走去駁線。再加上兩套角球設計，同積臣後備入場後提供嘅直接打法，沙比手上開始唔止得十一個位置，而係同一套陣入面，開始有幾種可以隨人腳切換嘅玩法。

當然，都要再強調一次，呢刻距離「練成」當然仲遠。米蘭壓迫唔強、雙10號仍然間中撞車、正選階段嘅開放進攻亦未算真正流暢。但至少今次唔再係我哋對住排陣表幻想化學反應，而係場上真係開始有火花。

至於係咪Work，就等英超開季之後先驗貨。反正今場嗰隻白老鼠，已經俾人電到嘔白泡。