【車迷觀點】死球部門可以開枱打麻雀 車仔觸發解約條款搶維拉專家
我估無乜人留意，早一個星期車路士突然宣布，死球部門嘅Bernardo Cueva唔再落葛咸帶日常訓練，亦唔會加入比賽日團隊，改任Set-piece Analyst and Advisor。老老實實，當時我第一反應係：嗯，仲唔係上季排第十、太柒要燉人冬菇出氣？
雖然我唔認為踢得柒完全關死球事，Cueva亦證明咗佢有能力。上季開季，我先寫過佢點樣由最初水土不服，進化成集中轟炸近柱嘅「Cueva 2.0」；由死球弱手變成曾經嘅近柱FC，至少證明佢唔係只識坐喺電腦前面玩……手指。
然後幾日後，「點解燉冬菇」嘅答案自己浮咗上水。車路士準備觸發解約條款，由維拉搶走死球專家Austin MacPhee。連埋沙比阿朗素同佢助教Sebastian Parrilla，車仔個死球部門突然由一個人包辦，變成可以坐低打牌嘅4人組合。
問題係，車路士上季嘅死球表現明明唔算災難，Cueva亦證明過自己識得進化，點解仲要畀錢撬多一個專家返嚟？唔通現代足球真係癲到，連開個角球都唔可以一個人話事？
三朝元老留足五年 MacPhee唔係普通死球仔
咁Austin MacPhee究竟係咩料，勁到車路士專登觸發解約條款搶人？
MacPhee喺2021年加入維拉，先後服侍過Dean Smith、謝拉特同艾馬利三任領隊。一般助教遇上球會換帥，好多時都會連人帶凳一齊俾人抬走，但佢唔單止
無走，仲一路留到今日。三個領隊踢法唔同、班底唔同，最後都不約而同地覺得呢條友有用，至少證明佢唔係食正某一條水先呃到五年人工。
數字上亦的確幾誇張。維拉上季各項賽事靠死球攻入29球，據報同Dark Art FC並列全英格蘭最多；過去三季更加累積74球。
不過戴返頭盔先，呢個數字包括角球、罰球、十二碼，甚至部分死球之後嘅第二落點，亦唔可以將74球全部入晒MacPhee數。死球教練設計得再靚，都要有人斬得準、有人撞得贏，龍門間中派膠，先會變成真正嘅入球。
如果收窄到只睇英超，維拉上季有18個死球入球，死球xG係14.8；車路士其實亦有13球，死球xG更加去到14.0。即係兩隊製造出嚟嘅機會，無想像中差得咁遠。只係同一碟餸擺到面前，維拉食到連汁都撈埋，車路士就食咗幾啖，然後話自己飽咗。
所以車路士睇中MacPhee，唔只係因為維拉多入五球。由Midtjylland、赫斯，到北愛爾蘭、蘇格蘭、維拉同葡萄牙，球會又好、國家隊又好，手上有咩人佢都砌到一套玩得掂嘅死球戰術。而佢最麻煩嘅地方，就係唔會每次都出同一張牌。你明明見到班球員企好晒，大概知道佢哋想點，但到個波開出嚟嗰刻，中招嘅通常都係對手。
用C朗證明一次 MacPhee最叻嘅欺敵戰術
講MacPhee套死球戰術有幾多變化，齋用「欺敵」、「走位」呢啲字眼，其實同講一個翼鋒技術好、速度快差唔多，講咗等於無講。不如直接睇返今届世盃葡萄牙對烏茲別克嗰兩個罰球。果晚我親眼睇住，有少少驚艶到。
第一球，葡萄牙喺禁區頂偏右位置搏到罰球，C朗同紐奴文迪斯一齊企喺個波前面。全世界都望住C朗，等佢擘髀、深呼吸，再轟個招牌式罰球。
你、我、單眼佬、仲有烏茲別克龍門顯然都係咁諗，企位稍為偏向左邊，準備應付C朗用右腳繞過人牆。點知C朗一開始助跑，真正起腳嘅反而係左腳嘅紐奴文迪斯。個波唔算貼柱，但龍門重心一早俾C朗呃走，只能夠眼白白望住個波入網。
戴返頭盔先，C朗賽後話呢球係佢臨場叫紐奴文迪斯射，唔可以見到MacPhee企喺場邊就乜都話係佢功勞。但成件事正正示範咗死球設計最重要嘅一點：最危險嘅球員，甚至唔需要掂到個波。只要對手相信佢會出手，企喺度已經可以拉走龍門注意力。
葡萄牙另一球更誇張。又係C朗企定準備射，助跑之後卻直接越過個波，突然衝向人牆後面；般奴就輕輕挑過人牆，將個波送到C朗面前。最後龍門及時出迎救到，成套戰術只係差半步就成功。
即係同一張C朗罰球牌，第一次佢負責吸引龍門，第二次直頭由主罰者變成接應者。到角球嗰陣，般奴又先大大動作叫隊友離開龍門，扮到似準備普通外彎角球，實際就突然叫兩個人殺入近柱製造混亂，最後逼到對手擺烏龍。
MacPhee唔係每次都變一個完全唔同嘅魔術，而係故意將起手式整到差唔多。你見到C朗企喺個波前面，自然會先諗佢射邊邊；到你幾經辛苦估中佢唔射，佢已經由人牆另一邊走甩咗。
死球得幾秒鐘，防守球員根本無時間停低開會。MacPhee亦唔使呃晒成條防線，只要龍門重心錯半步、人牆望錯人一秒，手牌已經食得出。
唔係燉冬菇咁簡單 死球部門終於坐齊一枱
咁講返最初個問題，車路士明明已經有Cueva，點解仲要畀錢撬MacPhee返嚟？
答案可能係，現代足球嘅死球部門，根本唔應該由一條友包辦。
一個角球由出世到落場，先要睇片同跑數據，搵出對手點守、龍門鍾意出迎定縮喺白界、邊個守衛最容易望波唔望人。搵到弱點之後，又要將佢變成實際戰術，落訓練場逐步排練；到比賽日，再按正選名單同臨場形勢決定出邊張牌。
以前呢堆嘢，好大部分都壓咗喺Cueva一個人身上。研究係佢、設計係佢、落場教又係佢，比賽嗰陣仲要企喺場邊睇住班球員有無突然失憶。做得好就話係球員叻叻豬，做得差就第一個俾人問係咪白受糧，份工其實幾惡做。
依家將Cueva改任analyst and advisor，再由MacPhee接手日常訓練同比賽日工作，分工就合理得多。Cueva可以專心喺幕後拆解對手同準備方案；MacPhee就將份功課變成球員真係記得住、跑得出嘅戰術。Sebastian Parrilla本身就係沙比阿朗素教練團入面負責死球嗰個，可以將成套安排接返入每場比賽嘅整體部署。
雖然車路士無公開過組織圖，實際分工肯定會有重疊，但至少由職位變動睇，Cueva唔似俾人燉冬菇，反而似由前線抽返入研究室；MacPhee亦唔係嚟搶佢張凳，而係補返一直無人坐嗰個位。
四個人開枱 最後都要有人食糊
當然，死球部門由一個人變四個人，唔代表下季車路士會自動變成死球FC。MacPhee套戰術設計得再靚，都要班球員記得自己跑A餐定B餐。人多咗，搞得唔好甚至可能變成四個人各有一套諗法，開個角球都要內部投票。
維拉嗰套亦唔係插隻USB落去，就可以直接Copy and Paste落車路士。人腳、主罰質素、制空力，以至沙比阿朗素願意分幾多訓練時間畀佢，全部都會影響最後效果。
不過，車路士至少肯將死球當成獨立部門去經營。四個人坐齊，唔代表鋪鋪食糊；但張枱點砌、邊個洗牌、邊個出牌，至少終於似返有分工。
至於最後係清一色、十三么，定係四條友打到小相公，就要等開季先知。