【季後分析】25/26山齊士神鬼正式退場 剩低嘅普通人夠唔夠做一號

期待值回顧：唔使再做神，至少唔好突然做鬼

望返24/25球季，山齊士仍然係車路士陣中最矛盾嘅球員之一。

佢英超撲救成功率達到73.4%，高空波控制同禁區外掃蕩亦位列聯賽前列；但長傳失準、受壓下決定混亂，再加上多次直接導致射門或者失球嘅錯誤，令球迷永遠唔知道下一秒會見到山神，定係山泥傾瀉。

季尾世冠盃，佢就展示咗最理想嘅版本。六場比賽救出22次射門，決賽面對PSG完成六次撲救，協助車路士捧盃之餘，自己亦贏得金手套。

更加驚喜嘅係，佢多次用長傳越過PSG第一重逼搶，直接搵右路嘅古斯圖同彭馬，其中一次更加成為首個入球嘅起點。原本最令人驚嘅弱點，突然變成打爆歐洲冠軍嘅武器。

所以25/26真正要驗收嘅，係山齊士可唔可以將世冠盃嗰個冷靜、果斷兼識得用球嘅版本，變成每星期都可以出現嘅正選門將。

今季實際交貨：神鬼劇情收斂，成為真正全勤一號

山齊士今季各項賽事上陣50場，49次正選，按球會官方比賽時間合計4,844分鐘，錄得15場不失球，係全隊上陣時間最多嘅球員。

單計英超，佢35場全部正選，踢足3,039分鐘，完成98次撲救，取得9場Clean Sheet。對一個過去仍然需要同柏祖域、祖真遜爭位，甚至一度被馬蛇收起嘅門將嚟講，今季終於真正坐穩一號位置。

最大進步，係佢

無再經常親手製造災難。

英超只記錄到一次失誤直接導致入球。即使羅生接手後要求山齊士踩住個波，等對方前鋒壓到最後一刻先決定點處理，佢亦無變成後場最先爆炸嗰個。

撲救表現就無上季咁亮眼。成功率由73.4%跌至67.6%，每90分鐘失球亦由1.06球升至1.45球。不過，佢面對嘅中龍射門增加，最終仍然錄得正1.70球Goals Prevented，唔可以話佢突然失去撲救能力。

十二月作客般尼茅夫就係最好例子。車路士前線全場便秘，後防又不斷俾人衝擊，山齊士完成五次撲救，尾段更加擋出施曼尤勁射，幾乎一個人將0比0抬返倫敦。

今季更多時候，佢前面嘅防線一篤就穿，隊友又不時領紅提早返更衣室沖涼，令龍門口忙過Lunch時間嘅麥當勞。喺呢種環境下，失球上升唔可以全部算落門將頭上。

山齊士今季交出嘅，唔係另一個金手套級別嘅高光球季，而係一份相對平靜嘅全勤紀錄。

數據與場上解讀：神救少咗，門將以外嘅工作多咗

山齊士今季最值得肯定嘅能力，仍然係對禁區空間嘅控制。

佢英超完成42次High Claim，位列同位置球員前列，另外有23次以清道夫身份離開龍門處理攻勢。對手斬高波入禁區，佢敢喺人堆中出迎；防線被放身後，佢亦願意衝出禁區清波。

呢啲數據唔係純粹受惠於Dark Art，亦唔係靠兩米身高企喺度等個波跌落嚟。山齊士會主動判斷落點，再利用臂展喺前鋒接觸個波之前完成攔截。

用波就仍然係一幅好奇怪嘅畫。

佢長傳成功率只有32.1%，但同時完成199次準確長傳、創造5次機會兼交出1次助攻。對紐卡素，佢把握對方防線未企穩，快速開出長球直接助攻祖奧柏度；對賓福特亦多次用相同方式搵尼圖。

當對手企定逼搶，要佢慢慢用長傳搵隊友，準繩度仍然會令人炆，堅係間中就一腳踢出界外；但一旦見到對方閘位壓前，快速開波反而可以直接將防守變成反擊。

佢唔係一個長傳發牌員，而係間中會突然睇到直線嘅反擊發射器。

今季嘅山齊士無再單靠一雙手製造大量神蹟，但掃蕩、高空波同開波選擇都比以前成熟，開始完成到現代門將需要負責嘅不同工作。

問題位：計時炸彈拆咗，但仍然未變成石屎牆

山齊士少咗低級失誤，但唔代表所有危險判斷都已經消失。

九月作客曼聯，開賽五分鐘，佢衝出禁區阻止麥比奧莫單刀，結果收掣不及直接被逐。車路士幾乎全場十人應戰，最終輸1比2。

嗰次唔係傳波送禮，亦唔係接甩簡單射門，但本質仍然係判斷失誤。清道夫出迎本來係山齊士嘅優點，慢半秒就會即刻變成自爆。

聯賽盃四強首回合對阿仙奴，另一種舊問題亦重新出現。先係角球出迎撲空，被賓韋特頂入；之後再接甩傳中，俾約基利斯執雞。平時最值得信任嘅高空波處理，一場之內連續失守兩次。

所以話佢完全無派膠並唔準確。比較貼切嘅講法係，派膠由固定播放，變成偶爾先出現嘅特別節目。

更大問題係，當佢無犯錯，能否提供足夠嘅額外價值。

山齊士可以救出高難度射門、控制高空波，亦可以用長傳發動反擊。但當防線開始崩潰，佢更多時候只係盡力救得幾多得幾多，未能用一連串撲救將對手打到懷疑人生。

龍門唔可能獨力解決所有問題，但頂級門將嘅價值，正正係當保護消失，仍然可以令個龍門比實際睇落更細。

山齊士證明自己無再係車路士最大嘅計時炸彈。只係球會真正需要嘅，未必只係一個唔會爆炸嘅門將。

下季定位：可以繼續做一號，但件球衣唔係私人物品

沙比阿朗素嘅三後衛體系，理論上可以放大山齊士嘅優點。

三名中堅拉開接波，門將短傳選擇增加；當對手逼搶過度，兩邊翼衛亦可以成為長傳目標。山齊士只要準確判斷幾時引對手壓上、幾時直接放長，就已經可以發揮作用。

三中堅亦能夠提供更多禁區保護，配合佢本身嘅高空波控制同掃蕩能力，戰術上無必須換走佢嘅理由。

但繼續正選，唔代表位置應該完全無競爭。

車路士過去嘅問題，係無論山齊士表現點樣，最後往往都會自動返回正選。當後備門將只係盃賽專員，佢自然知道球會無真正替代方案。

下季無歐洲賽，沙比需要盡早確立一號，但失誤控制、後場出球、禁區指揮同關鍵撲救，都應該接受真正競爭。

山齊士目前仍然係隊中最完整、最有實戰證明嘅門將。問題係，呢個結論代表佢已經足夠出色，定係其他選擇更加未準備好。

球會唔需要急住換門將，但亦唔應該將「無更好人選」包裝成「已經搵到長期答案」。

山齊士可以繼續着住一號球衣，只係件球衣唔應該變成佢嘅私人物品。

評級：B-

50場上陣、49次正選、全隊最多比賽時間。山齊士今季至少完成咗正選門將最基本嘅任務：長期企喺度。

佢減少低級失誤，適應更加冒險嘅後場要求，高空波同掃蕩維持高水平，間中亦可以用撲救或者長傳直接改變比賽。

所以唔會俾C+。今季嘅山齊士唔再係一個神救同派膠互相抵銷嘅計時炸彈，而係有明確戰術價值嘅正選門將。

但點解無B？

因為車路士對一號門將嘅要求，唔應該只係「大部分時間無犯錯」。

曼聯嗰張紅牌同聯賽盃對阿仙奴嘅兩次失誤，證明舊有判斷問題未完全消失。更加重要嘅係，車路士無真正變成一支難以攻破嘅球隊。

呢個當然唔可能全部怪門將，但山齊士亦未有足夠多次將一場應該輸嘅比賽強行拖住。所以最後只俾B-。

以前寫山齊士，問題係下一秒會見到神定鬼。

今季終於有第三個答案：一個正常、可靠，但未足以令人停止尋找升級可能嘅門將。

B-，無得再高。