【季後分析】25/26車路士騎呢頒獎典禮 睇下邊個最膠最估佢唔到？

禁區旅遊大使獎

一聽就知，呢個獎係用作表揚一班極具打卡精神嘅前場球員。你以為佢入禁區係準備大開殺戒，實質上佢只係熱衷於衝入進攻心臟地帶，親切咁幫大家介紹球場景點。

得獎者：

基頓斯

得獎原因：

量度禁區廢柴有個好簡單嘅自創指標：xG ÷ 禁區觸球次數。呢個數字最能夠精準反映出，到底球員每次成功殺入對方最危險嘅腹地時，實質上可以轉化到幾多起腳威脅。

而基頓斯嘅數據，就將呢個獎嘅騎呢精髓發揮到淋漓盡致。佢每場平均喺對方禁區入面錄得高達 3.59 次觸球，唔講我仲以為自己睇緊美斯嘅數字，但佢最終換返嚟嘅場均 xG，只有可憐嘅 0.082。

用數學公式簡單換算返，等於佢每次喺禁區核心地帶掂波，只能夠產生大約 0.023 xG。再退一步講，佢要喺禁區重複同樣嘅觀光動作足足 44 次，先至可以喺統計學上累積到 1.0 xG。

嗯，44 次到底要踢幾多場先儲到？照佢每 90 分鐘 3.59 次禁區觸球計，大概要完整踢足 12 場。人哋入禁區係搵食，佢入禁區好似儲印花，儲夠十幾場都未知換唔換到獎品。

佢從來都唔係突破唔到，亦唔係帶唔到波去危險區域，而係每一次辛辛苦苦衝到入禁區之後，佢就突然好似中咗降頭咁，由殺手退化成最愛鳩嗚嘅觀光客。每次入去禁區都純粹係想影張相打個卡、話俾大家知「我到此一遊」，多過真正想一腳將個波轟入網。呢個旅遊大使頭銜，佢絕對當之無愧。

YouTube 球王大獎

顧名思義，呢個獎係用作表揚一眾精華片段型球員。單睇網上啲 Highlight 片段，佢哋嘅腳法可能勁過比利，但現實係佢哋往往只有扭波過人嗰一幕，扭完之後嘅推進威脅同創造力完全不成比例，永遠冇下文。

得獎者：基頓斯

得獎原因：

係，又係佢。我呢位評審都覺得好尷尬。

今次唔需要發明太複雜嘅公式，只要將盤扭量，同盤扭之後帶嚟嘅推進威脅及創造力擺埋一齊睇，就已經足夠殘忍。

而基頓斯嘅數據，再次為我哋帶來極強嘅畫面感。佢每 90 分鐘錄得高達 6.24 次盤扭，數字上絕對係隊內最頂級、最鍾意扭波嘅球員。如果你平時只係開 YouTube Shorts 或者 Reels 睇佢，佢每段片都好似新夏薩特降臨一樣，假身內切極度清脆。

但當你拉返 90 分鐘嘅數據出嚟，就會發現好多突破其實只係靚仔地推前兩步，對大局毫無幫助。佢每 90 分鐘嘅 xT Carry 只有可憐嘅 0.047，關鍵傳球更低見 0.31。換言之，佢唔係唔扭，係扭完之後個故事通常去唔到下一集。

相比之下，陣容入面盤扭次數差唔多嘅加拿祖，xT Carry 達到 0.097，關鍵傳球更有 1.01。人哋扭完波起碼真係撕開到防線、帶動隊波向前走。反觀基頓斯，有波喺腳就一定要玩個人主義，結果下下無以為繼。呢個活喺精華入面嘅「YouTube 球王」，佢當之無愧。

最佳冗員大獎

一聽個名就知道，呢個獎係用作表揚一班「睇落態度滿分、實際產能另計」嘅球員。呢類球員喺球場上跑動好多、逼得好盡，但實質上往往徒勞無功。情況就好似公司入面成日話自己好忙、行嚟行去嘅同事，看似為公司鞠躬盡瘁，但當你問佢今日到底完成咗咩，佢又完全答你唔到。

得獎者：戴納

得獎原因：

量度呢種盲目奔跑，可以將幾組數據擺埋一齊睇：前場壓迫次數極高，但實際奪回球權同成功防守動作偏低。即係有態度、有體能，但最後記落佢自己本數嘅成果往往唔多。

先戴返個技術頭盔，Pressing Duel、奪回球權同成功防守動作唔係同一條流水線。一次壓迫可以逼到對手傳失，最後由隊友搶返個波；一次球權回收亦未必直接來自壓迫。不過，將幾組數字放埋一齊，至少可以睇到佢嘅壓迫投入，同個人防守產出有幾唔成比例。

睇返數據，戴納今季每 90 分鐘大約有 2.70 次 Pressing Duel，喺一班前場攻擊手之中係最高嘅，證明佢真係好落力、絕對唔係企喺前場扮工。但問題係，佢每 90 分鐘奪回球權只有可憐嘅 1.25 次，成功防守動作亦只有 2.56 次。

對比之下，同樣好肯壓迫嘅彭馬，每 90 分鐘有 2.85 次奪回球權同 3.92 次成功防守動作；而祖奧柏度嘅回收球權亦高達 2.91 次。兩組數字一比，戴納就顯得極之尷尬。佢喺呢批前場球員入面壓迫得最積極，但實質記喺自己名下嘅成果居然係最少。

佢喺場上Call會、覆 Message、CC 全世界做足全套，有追、有逼、有跑，但往往只能夠喺空氣中撲空，產出完全追唔上同事。呢種勤力但無用嘅表現，呢個大獎佢當之無愧。

防線恐怖分子大獎

呢個獎顧名思義，係要搵出邊個係「每次自己半場失波都特別容易變大鑊」嘅炸彈人。我哋引入一個指標叫危險轉化率（自己半場危險失誤 ÷ 自己半場總失波）。淨睇總數你只會知邊個甩波多，但加埋呢個轉化率，先至會知邊個唔爆猶自可，一爆就搞出人命。

得獎者：艾殊邦

得獎原因：

可憐嘅邦仔，明明出場時間已經唔多，但居然得獎。不過先戴頭盔，出場時間唔多代表樣本細，但佢嘅 Per 90 數字依然觸目驚心，呢個先係真係恐怖嘅地方。

邦仔每 90 分鐘有 3.86 次自己半場失波，單睇數字雖然唔係全隊最高，但佢每 90 分鐘錄得高達 0.94 次危險失誤，直接高居全隊第一。最恐怖嘅係佢嘅危險轉化率高達 24.4%，代表佢每喺後場甩 4 次波，就有 1 次會直接將整條防線送入險境。

用人話講，佢未必係場場爆炸，但一著火就多數要消防車到場。呢種一甩就大鑊嘅特質，令看台球迷同門將心臟都 Keep 住瘋狂跳動，呢個恐怖分子頭銜絕對實至名歸。

不過講到後場驚嚇，今次典禮必須加設一個特別獎項，叫做

後場玩火大獎，得主係科芬拿。

科芬拿嘅數據非常奇特，佢每 90 分鐘喺自己半場失波高達 5.21 次，全隊最高，直頭係無時無刻都喺後場點火。但神奇在佢嘅危險失誤得 0.56 次，危險轉化率只有 10.7%。

即係話，佢係屬於「長期玩火、但未必次次引爆」嘅高空鋼線人。雖然佢失波多，但未必每次都即刻變災難場面。不過，正如大家季尾所見，長期咁樣喺危險邊緣試探，總有一日會出大事。季尾條防線頂唔順集體崩潰，呢位玩火大師絕對有不可磨滅嘅功勞。

史丹福橋和平獎

呢個獎唔係懲罰射得少嗰班，而係表揚最擅長將高質素機會射到冇晒威脅嘅前場球員。每當隊友辛辛苦苦送到個波去危險區域，佢總能用最和平、最不具殺傷力嘅方式，親切地幫對面後防化解危機。

得獎者：加拿祖

得獎原因：

要量度邊個最叻幫對面解圍，可以睇一個進階數據：PSxG - xG。xG 代表呢腳射門起腳前、個機會本身有幾大威脅；而 PSxG 則代表射完之後，個波實質中龍嘅威脅有幾高。如果兩者相減得出負數，即係你用自己嘅業餘射術，將一個原本好有威脅嘅攻勢，射到完全冇晒威脅。

而加拿祖今季就交出咗一組非常神聖嘅數字：PSxG - xG = -1.56。

呢個累積數字代表咩？代表佢唔係冇人傳波，亦唔係去唔到靚位置。相反，佢成日都會出現喺你覺得「有啲嘢睇喎」嘅核心地帶。但下一秒，原本仲有少少殺傷力嘅機會，只要經佢隻腳一射，個威脅值就會瞬間被消滅。每次起腳，對面門將即刻安心，後衛即刻拍手，車迷就即刻抱頭。某程度上，佢比對面中堅更加有效率，因為對面仲要跑去封位攔截，佢自己一腳已經幫人完成清波解圍。

當然，最後都要理性戴返個技術頭盔。PSxG - xG 出現負數，往往會受到被迫急射或者對手極限封位影響。睇返加拿祖今季嘅場均 xG Per Shot 其實有 0.11，證明佢平均起腳位置都有一定質素，雖然未去到祖奧柏度嗰種真正黃金機會，但起碼都有板有眼。

去到全季累積 -1.56 呢個幅度，當然未足以判定佢成世都係射門廢柴，但至少喺 25/26 球季，佢最後一腳嘅處理確實長期出事。呢個和平獎，唔係終身成就獎，但今年由佢攞走，絕對冇得投訴。

最強人肉沙包大獎

呢個獎簡單爆，只計一件事：每 90 分鐘到底輸幾多次防守對抗。因為如果一個球員全場只係對抗一兩次，就算輸晒、勝率係 0% 都未必真係影響大局；相反，就算勝率唔差，輸咗嘅對抗次數依然可以多到嚇你一跳。

得獎者：古古尼亞

得獎原因：

要量度邊個食得最多拳，公式係用每 90 分鐘防守對抗次數乘以輸嘅百分比。

而古古尼亞今季嘅數據就極之矛盾。佢每 90 分鐘要進行高達 7.56 次防守對抗，參與量係全隊最高級別，證明對手經常搵佢嗰邊做突破口，或者隊友失位要佢出手補鑊。雖然佢嘅防守對抗勝率有 61.72%，表面睇絕對合格甚至算係唔錯，但因為基數實在太大，換算落嚟，佢每 90 分鐘仍然大約會輸 2.89 次防守對抗，無奈地成為全隊輸對抗次數最多嘅球員。

呢個獎頒畀佢其實有少少悲情。佢唔係最軟弱，但佢係全隊最常被迫進入埋身戰嗰個。當你日日都要上擂台打交，總會有幾拳食正落面。古古尼亞今季就係咁：好勤力、好搏命，但數據上輸防守對抗嘅絕對量，仍然令佢無奈成為全隊最強人肉沙包。

總結：騎呢獎唔等於最差球員榜

典禮到此結束，六個正式獎項各有得主，基頓斯更加一晚梅開二度，另外仲有科芬拿勇奪特別獎項。

不過笑完都要戴返頭盔。呢份名單唔係今季最差球員排行榜，更加唔代表所有得獎者都應該即刻清洗。有啲獎反映真缺點，例如基頓斯扭完冇下文、加拿祖將機會射到和平收場；有啲就同角色、工作量或者樣本有關。古古正正係最好例子，佢唔係對抗最差，只係打得最多，結果連食拳都食得比人多。

但呢啲騎呢數據，仍然忠實記錄咗 25/26 球季最荒謬嘅一面。BlueCo 用天價買返嚟嘅年輕未來，今季最先集齊嘅唔係獎盃，而係禁區旅遊大使、YouTube 球王、最佳冗員同史丹福橋和平獎。人就真係買咗好多，至於幾時先砌得成一隊波，評審團仍然等緊答案。

希望下年同樣時間，候選名單可以短少少。最好短到連篇文都寫唔成，我絕對願意犧牲呢個年度傳統。

不過照 BlueCo 個買人速度睇……嗯，下年再見。