【車迷觀點】林伯青春風暴係奇蹟定執雞 車仔19/20個第四有幾多係佢功勞

66分第四，係奇蹟定執雞？

戴多次頭盔，我無打算要反任何人，只係想搵個自己覺得ok嘅結論出嚟。

先由最唔浪漫嘅數字講起。

車路士19/20球季以66分排英超第四。前一季熱刺

71分、阿仙奴70分，去到19/20就分別跌到59分同56分。如果大家仲記得，因為嗰季有Covid搞到英超停咗，原本最有條件攞走張歐聯入場券嘅李城，復賽前仲領先車仔5分，最後9場卻只攞到9分。

換句話講，當季前四合格線大跌係事實，李城季尾更加親手讓咗個關愛座俾車仔。要話完全無執雞成分，咁就真係自己呃自己。

但車路士又唔係一路排第六、第七，去到最後兩輪先發現地下有張歐聯入場券。

由大約第8輪開始，車仔已經長期留喺前四。首19場攞32分，後19場攞34分，前後半季穩定得近乎沉悶。佢哋唔係季尾突然爆Seed，只係一路維持住前四邊緣水平，最後無好似李城咁自爆。

更加重要嘅係，嗰季車仔全季錄得76.23 xG，排聯賽第二；xGA為41.09，xGD達到+35.14，排第三。按每場機會質素推算，預期積分係73.49分，同樣排第三，比實際66分仲要高7.49分。

當然，預期積分唔係真正積分，唔可以拎住73.49就話林伯其實帶出73分。模型無法完整計算門將、埋門能力、死球執行同每場波嘅戰術選擇，但至少可以推翻一個講法：

嗰季嘅車仔唔係踢住第六、第七名嘅垃圾波，純粹等其他隊逐個跌低。

正確少少講，係大家都考差咗，降低咗合格線，但張試卷始終係林伯自己做合格。個第四有執雞成分，但林伯有認真落手執隻雞。

青春風暴唔係撳掣生成，林伯到底做啱咗咩？

咁係咪代表「林伯接手一副爛牌，單靠青訓創造奇蹟」呢個故事完全成立？

又未去到咁誇張。

嗰季嘅Debuff全部都係真。夏薩特離隊，球會夏季無法註冊新球員；簡迪傷患反覆，魯迪加同占士季初同樣受傷。林伯本人更加只有一年英冠領隊經驗，就要直接接手一支歐聯球隊。

不過，呢副牌亦唔係傳說中咁爛。

陣中仍然有艾斯派古達、魯迪加、簡迪、佐真奴、高華錫、韋利安同基奧特等成熟球員，骨架始終來自上季英超第三兼歐霸冠軍陣容。

所謂「一班青訓仔」，亦唔係朝早仲踢緊U18，夜晚突然收到WhatsApp叫佢哋去史丹福橋踢波。艾巴咸喺維拉入過25個英冠入球；曼治同杜姆尼跟過林伯踢打比郡；占士亦喺韋根完成英冠鍛鍊。林伯對佢哋嘅能力同使用方法，本來就非常熟悉。

所以副牌牌面唔算靚，但亦唔係爛到任何人接手都要輸足三十番。

真正值得讚林伯嘅地方，係佢無將青訓當成轉會禁令下嘅茄呢啡，而係真係將佢哋當成主角咁用。

單計英超，艾巴咸攻入15球、曼治7球、占士2球、杜姆尼同奧度爾各入1球，一班青訓合共至少貢獻26個聯賽入球。唔係去到80分鐘領先三粒，先換入場影畢業相，係堅有貨賣。

最能夠證明林伯「真係做過嘢」嘅數據，亦唔係第四名，而係進攻產量。

沙利最後一季，車路士有夏薩特交出聯賽16球15助攻，全季錄得63.97 xG。去到林伯第一季，夏薩特已經離隊，車仔實際入球卻由63球升到69球，xG更加增加12.26，升至76.23。

林伯無可能複製另一個夏薩特，於是佢索性將進攻責任拆散。

曼治帶動前場壓迫，艾巴咸負責拉扯同接應，兩閘拉開球場闊度，中場大量後上；失去控球之後，成班人立即反搶，再製造第二次進攻。

呢套踢法唔算精密，甚至有少少「大家後生有氣有力，一齊衝咗先算」。但對於一班想證明自己、跑得、壓得，又熟悉林伯要求嘅年輕球員，好似雷系打水飛系一樣，效果拔群。(無人明嘅Pokemon梗)

轉會禁令亦唔係一面倒嘅Debuff。

禁令削弱咗陣容，卻同時降低咗球迷與管理層期望，給予林伯一般車路士領隊無可能得到嘅容錯空間。佢唔需要一上任就處理幾名高價新兵嘅角色同更衣室地位，可以直接起用自己最熟悉嘅青年球員。

環境確實幫林伯搭好咗個舞台，但青春風暴唔係轉會禁令撳一個掣就會自動生成。

將一班有潛力但未證明過自己嘅年輕球員，變成真正幫球隊攞分嘅英超主力；喺失去夏薩特後，反而建立出聯賽第二高嘅xG，呢啲始終係林伯嘅功勞。

咁啱個Project啱佢做，唔代表佢識做每一份

問題係，19/20球季踢得好嘅地方非常鮮明，踢得差嘅地方同樣早已存在。

林伯嘅壓迫夠積極，但積極唔等於完整。好多時曼治同艾巴咸已經衝咗出去，後面中場同防線卻未有同步推前，一旦第一下壓迫失敗，中路就會闊過西隧。

兩閘推高、中場後上、多人殺入禁區，的確換來大量進攻，但身後嘅Rest Defence長期漏風。簡迪在場時仲可以靠個人能力周圍救火；簡迪唔喺度，佐真奴就要單獨處理大片空間，畫面通常都唔會太適合一家大細觀看。

死球防守亦係另一個死穴。車仔當季失咗14個死球，問題唔止係球員唔夠高大，站位、分工同跟人亦長期混亂。

至於Kepa，確實將問題由「未夠穩」放大成災難。車仔全季xGA只有41.09，實際卻失54球，相差接近13球，足以證明林伯俾龍門拖累得好慘。但死球站位混亂、壓迫失位同轉換時留下大片空間，始終唔可以賴晒Kepa。佢係災難放大器，前提都要有災難發生。

面對Low Block，林伯亦唔係束手無策，但始終缺乏穩定解法。嗰季車仔主場先後輸俾韋斯咸、般尼茅夫同修咸頓，劇本往往非常相似：對手收窄空間，車仔傳球速度開始下降，兩閘不斷斬波。前面拆唔開，後面再俾人一次反擊或者一個死球收皮。

換句話講，林伯第一季嘅缺點並無消失，只係進攻產量、青春活力同低期望環境，暫時遮住咗啲裂縫。

到第二季大手增兵，份Job Description就完全唔同。

第一季嘅任務係提拔熟悉嘅青年球員、重建信心同活力，前四已經算超額完成。第二季就變成整合夏維斯、雲拿、薛耶治等高價新兵，建立豪門級位置進攻，同時處理上陣時間、更衣室地位同爭標期望。

林伯最擅長嘅，係帶住一班低期望、年輕、有衝勁，而且願意為佢跑嘅球員向前衝。

但當對手唔再同你鬥跑，轉而退後等你拆；當更衣室由「俾機會我證明自己」變成「球會用幾千萬買我返嚟，點解我唔係核心」；當球會要求由製造活力升級成控制比賽，林伯嘅能力就未跟得上。

之後愛華頓嘅失敗，同2023年第二次上車11場只贏1場，證明林伯當時仍然未補好呢啲缺口。

但故事去到高雲地利，又出現咗一個幾有趣嘅轉折。

落到英冠重新起步，林伯再次接手一支需要重建信心、釋放年輕球員同提升進攻能量嘅球隊，結果先帶隊打入升班附加賽，再贏得英冠冠軍升上英超。

呢段經歷唔足以證明佢已經進化成頂級領隊，但至少修正咗「19/20只係一次撞彩」呢個判詞。林伯嗰套方法唔係完全無法移植，只係適用範圍非常清楚。

俾一支有活力、有成長空間、需要被重新點燃嘅球隊佢，林伯真係有辦法將件事做好；但要佢接手一個高期望、球星林立、每場都要控制局面嘅豪門Project，暫時仍然係另一份工。

總結：第四唔係佢一個人抬返嚟，但無佢亦未必抬得到

所以，19/20個第四有幾多係林伯功勞？

前四門檻跌到66分，係對手集體失速；仍然擁有歐霸冠軍骨架，係前人留低嘅資產；轉會禁令降低期望、簡化選擇，係特殊環境送俾佢嘅Buff。

但將青訓由故事變成實際入球，失去夏薩特後仍然將xG由63.97推高至76.23，令一支前途未明嘅球隊長期守住前四，亦係林伯親手完成嘅工作。

所以，個第四唔應該全部歸功於林伯，但更加唔可以因為佢後來失敗，就將當年嗰季貶低成純粹執雞。

林伯唔係因為帶車仔攞第四，所以證明自己係頂級領隊。

真正答案係，嗰一年車路士最需要有人做嘅工作，碰巧就係林伯最識做嘅工作。而高雲地利嘅經歷更加證明，當另一支球隊再次需要同一種工作，佢依然識做同做得好好。